له‌وه‌ڵامی داواكارییه‌كه‌ی پێشتری عادل عه‌بدولمه‌هدی، وەزارەتی دەرەوەی ئەمریکا ڕایده‌گه‌یه‌نێت كه هیچ وەفدێک بۆ عێراق ڕه‌وانه ناكه‌ن کە باس لەکشانەوەی هێزەکانیان بکات.
ئاوێنه: وەزارەتی دەرەوەی ئەمریکا ئەمڕۆ هەینی لەبەیاننامەیەکدا ڕایگەیاندووه، هەر وەفدێکی ئەمریکی کە ڕەوانەی عێراق بکرێت بۆ جەختکردنەوەیە لەسەر پابەندبون بەپەیوەندییە ستراتیژییەکان، نەک کشانەوە لەو وڵاتە.
ئاماژه‌ی بۆ ئه‌وه‌شكردووه كه هه‌ردو وڵات پێویستیان بەتاوتوێکردنی پرسی ئاسایش‌و ئابوری‌‌و هاوبەشی دیبلۆماسییە.
وەزارەتی دەرەوەی ئەمریکا جه‌ختی له‌وه كردۆته‌وه كه بونی هێزەکانیان لەعێراق گونجاوە.
ئەمڕۆ هەینی، نوسینگەی سەرۆک وەزیرانی کاربەڕێکەری عێراق لەبەیاننامەیەكدا رونیكردبوه‌وه كه له‌میانه‌ی ئه‌نجامدانی په‌یوه‌ندییه‌كی تەلەفۆنی نێوان عادل عه‌بدولمه‌هدی‌‌و مایك پۆمپیۆ، وەزیری دەرەوەی ئەمریكا پەرەسەندنەكانی ئەم دواییەو خواستی لایەنە جیاجیاكان بۆ رێگەگرتن لەگرژییەكان‌و رێگەگرتن لەشەڕێكی كراوە، تاوتوێكراوە.
به‌پێی راگه‌یه‌ندراوه‌كه، سەرۆك وەزیرانی عێراق داوای لەمایك پۆمپیۆ كردوە كە نوێنەرانی وڵاتەكەیان بنێرن بۆ عێراق بۆ دانانی چەند میكانیزمێك بۆ جێبەجێكردنی بڕیاری پەرلەمانی عێراق بۆ كشانەوەی هێزەكانیان له‌عێراق.
هەروەك عادل عەبدولمەهدی بە وەزیری دەرەوەی ئەمریكای وتوە، بەبێ مۆڵەتی حكومەتی عێراق هێزی ئەمریكی هەن دێنە ناو عێراق‌و هەروەها فڕۆكەی بێفڕۆكەوانی ئەمریكی بەئاسمانی عێراقدا دەسوڕێنەوەو ئەوەش پێچەوانەی رێككەوتننامە كارپێكراوەكانە.