2020-01-12   787     
وتەبێژی تەڤگەری ئازادیی کۆمەڵگەی کوردستان ئاشکرایکرد، ئاسایشی هەولێر ئیدریس سەلیم-ی خستووەتە زیندانی تاکەکەسییەوە و ئەشکەنجە دراوە، دەشڵێت: ''مەترسی گیان لەدەستدانی ئەو ئەندامەمان هەیە''.
ئاوێنه: تارا حسێن، وتەبێژی تەڤگەری ئازادیی کۆمەڵگەی کوردستان، راگهیاندوه، "لە هەفتەی ڕابردووە ئیدریس سەلیم لەلایەن ئاسایشی پارتییەوە خراوەتە زیندانی تاکەکەسی و ئەشکەنجە دراوە".
وتیشی: "لە ئێستادا دۆخی تەندروستی ئەو ئەندامەمان تێکچووە و مەترسی ئەوە هەیە گیان لەدەستبدات، هاوکات بەهۆی ئەشکەنجەوە تاڕادەیەک دووچاری لەبیرچوونەوە هاتووە".
ئیدریس سەلیم، ئەندامی تەڤگەری ئازادیی کۆمەڵگەی کوردستانە و دانیشتووی شاری هەولێرە، لە ٨ی ئایاری ساڵی ٢٠١٩ەوە لەلایەن ئاسایشی هەولێرەوە دەستگیرکراوە، سەرباری هەوڵ و چالاکییە مەدەنییەکانیش بەڵام تاوەکو ئێستا ئازاد نەکراوە.