2020-01-13   731     
وەزیری دەرەوەی عێراق رایگەیاند، لەچوارچێوەی هەوڵەکان بۆ کەمکردنەوەی گرژییەکان لە ناوچەکە، رۆژی چوارشەممەی داهاتوو، محەمەد بن عەبدولرەحمان ئال سانی وەزیری دەرەوەی قەتەر سەردانی بەغدا دەکات.
ئاوێنه: لە تویتێکیدا محەمەد حەکیم، وەزیری دەرەوەی عێراق رایگەیاند، ''جێگری سەرۆک وەزیران و وەزیری دەرەوەی قەتەر، محەمەد بن عەبدولرەحمان سەردانی بەغدا دەکات'' و چاوەڕان دەکرێت محەمەد بن عەبدولرەحمان ئال سانی لەچوارچێوەی سەردانەکەی بۆ بەغدا بۆ گفتوگۆکردن سەبارەت بە کەمکردنەوەی گرژییەکان لە ناوچەکە لەگەڵ گەورە بەرپرسانی عێراق کۆببێتەوە.
هاوکات محەمەد عەلی حەکیم ئەوەیشی وتووە ''ئامانج لە سەردانەکەی محەمەد بن عەبدولرەحمان بۆ گفتوگۆکردنە لەگەڵ گەورە بەرپرسانی عێراق سەبارەت بە کەمکردنەوەی گرژییەکان لە ناوچەکەمان''.
شایەنی باسە ئەحمەد سەحاف، وتەبێژی وەزارەتی دەرەوەی عێراق لە لێدوانێکی رۆژنامەوانییدا رایگەیاندووە کە رۆژی چوارشەممەی داهاتوو وەزیری دەرەوەی قەتەر، محەمەد بن عەبدولرەحمان بەسەردانێک دەگاتە بەغدا کە لەمیانیدا بەجیا لەگەڵ سەرکۆمار، بەرهەم ئەحمەد ساڵح و سەرۆکوەزیرانی کاربەڕێکەر، عادل عەبدولمەهدی و سەرۆکی ئەنجوومەنی نوێنەران، محەمەد حەلبوسی وەزیری دەرەوە، محەمەد عەلی حەکیم کۆدەبێتەوە.
پێشتر وەزیری دەرەوەی قەتەر، محەمەد بن عەبدولرەحمان ئال سانی رایگەیاندبوو کە وڵاتەکەی لە نزیکەوە چاودێری پێشهاتەکانی عێراق دەکات و ئاماژەی بەوەیشکردبوو کە هەوڵەکانیان بە ئامانجی کەمکردنەوەی گرژییەکان لە ناوچەکە دەخەنەگەڕ.