2020-01-17 1226
لیژنەهاوبەشەکانی قائیمقامیەتی سلێمانی وه‌ڵامی سۆران عومه‌ر ده‌داته‌وه‌و رەتیدەکاتەوە دەستیان بەسەر پاقلەدا گرتبێت بەحەبی پاراستیۆڵ کوڵێنرابێت.
ئاوێنه: ئه‌مرۆ هه‌ینی سۆران عومه‌ر، ئه‌ندامی په‌رله‌مانی كوردستان له‌رونكردنه‌وه‌یه‌كدا ئاماژه‌ی بۆ ئه‌وه كردبو كه لیژنەکانی تەندروستی‌و قایمقامییەتی سلێمانی پاقلەفرۆشێکیان ئاشکراکردووه کە بۆ هەر مەنجەڵێک پاقلە بڕی ١٢ حەبی پاراسیتۆڵی تێکردووەو بەقسەی خۆی بەو شێوازە ئاسانتر دەکوڵێت.
له‌به‌رامبه‌رداو له‌ڕاگه‌یه‌ندراوێكی لیژنەهاوبەشەکانی قائیمقامیەتی سلێمانیدا هاتووه، "پاش ئەوەی لەلایەن ئەندام پارلەمانێکەوە لەرێی تۆڕی کۆمەڵایەتی فەیسبوک بڵاوکرایەوە کە لیژنەکانی تەندروستی و قائیمقامیەتی سلێمانی دەستیان بەسەرپاقلەداگرتبێت بەحەبی (پاراسیتۆڵ) کوڵێنرابێت، رەتیدەکەینەوە كە هیچ حاڵەتێكی وەها لەلایەن لیژنەکانی قائیمقامیەتی سلێمانیەوە تۆماركرابێت‌و هیچ بڕە پاقلەیەكی كوڵاویش دەستی بەسەردا نەگیراوە."
راشیگه‌یاندووه، "بەمەستی سەلامەتی تەندروستی هاوڵاتیان ئەو خواردەمەنیانەی رۆژانە دەیکڕن و دەیخۆن، قائیمقامیەتی سلێمانی لەڕێی (38) لیژنەوە لەبەرەبەیانێکی زوەوە تا درەنگانێکی شەو چاودێری وردی بازاڕو شوێنەگشتییەکان دەکات، سەرپێچیکارن سزادەدات کەبە سزای مادی دەستپێدەکات تاداخستنی شوێنەکە و روبەروکردنەوەی خاوەنەکەی بەدادگا."
جه‌خت له‌وه‌ش ده‌كاته‌وه كه هاوڵاتیان دڵنیادەکەنەوە کە قائیمقامیەتی سلێمانی و لیژنەهاوبەشەکانی چاوێکی کراوەدەبن‌و مکوڕدەبن لەسەر پاراستنی تەندروستییان.