كۆشكی سپی رایگەیاند، لە كۆبونەوەی نێوانیاندا لە داڤۆس، دۆناڵد ترەمپ،
سەرۆكی ئەمریكاو نێچیرڤان بارزانی، سەرۆكی هەرێمی كوردستان جەختیان لە پابەندبون
بە كاركردن بۆ تێكشكاندنی داعش كردۆتەوە.
ئاوێنە: کۆشکی سپی لە راگەیەندراوێکدا ئەنجامی کۆبونەوەی سەرۆکی هەرێمی
کوردستان و سەرۆکی ئەمریکای بڵاوکردەوە و رایگەیاند"سەرۆکی ئەمریکا سوپاسی نێچیرڤان
بارزانی، سەرۆکی هەرێمی کوردستانی کرد بۆ هاوبەشیی بەردەوامی هەرێمی کوردستان لەگەڵ
ویلایەتە یەکگرتووەکانی ئەمریکا. "
بەپێی راگەیەندراوەكە، لە کۆبونەوەکەدا هەردولا جەختیان لە پابەندی خۆیان بۆ
کارکردن بۆ تێکشکاندنی داعش دوپاتکردۆتەوە.
سەرۆکی ئەمریکا سوپاسی سەرۆکی هەرێمی کوردستانیشی کردوە بەهۆی پاڵپشتی
بەردەوامی هەرێمی کوردستان بۆ ئاوارە و پەنابەران.
هاوکات سەرۆکی هەرێمی کوردستان لە تویتێکدا لەبارەی کۆبونەوەکە رایگەیاند،
"لە کۆبونەوەیەکی بەرهەمدار و دۆستانەدا لە داڤۆس، خۆشحاڵم بوم بە بینینی سەرۆک
دۆناڵد ترەمپ، ئەو پێزانینی هەبو بۆ رۆڵی کوردستان لە شەڕی هاوبەش لەدژی داعش و
پارێزگاریکردن لە کەمینەکان. من سوپاسی سەرۆکی ویلایەتە یەکگرتوەکانی ئەمریکام کرد
بۆ سەرکردایەتی و پاڵپشتی. ئێمە قسەمان لەسەر بەشەکانی دیکەی عێراق و هاوئاهەنگی
ئابوری کرد."