نێچیرڤان بارزانی، سەرۆكی هەرێمی كوردستان رایگەیاند، روداوەكانی عێراق كاریگەریان لەسەر دۆخی هەرێمی كوردستان هەیەو بڕیارەكەی پەرلەمانی عێراقیش بۆ دەركردنی هێزە بیانییەكان بە بڕیارێكی "نادروست" ناودەبات و بەپێویستیشی دەزانێت هێزەكانی ئەمریكا لەعێراق بمێننەوە.
ئاوێنە: نێچیرڤان بارزانی، ئەمڕۆ پێنجشەممە، لەمیانی پانێڵێكدا لە كۆڕبەندی ئابوریی جیهان لە داڤۆس سەبارەت بە ئاڵۆزی و پشێوییە بەردەوامەکانی رۆژهەڵاتی ناوەڕاست و عێراق قسەی كرد.
نێچیرڤان بارزانی، سەرۆکی هەرێمی کوردستان لە وەڵامی پرسیاری ئایا دەکرێت هەرێمی کوردستان خۆی بەدوربگرێت لەو دۆخەی لە عێراق هەیە و خۆی جیا بکاتەوە؟ ئاماژەی بەوە کرد، روداوەکانی عێراق کاریگەرییان لەسەر هەرێمی کوردستان هەیە، هەرێمی کوردستان ناتوانێت خۆی لە عێراق جیابکاتەوە.
سەرۆکی هەرێمی کوردستان سەبارەت بە خۆپیشاندانەكانی عێراق رایگەیاند، نەوەی ئێستای عێراق ماندوبوە لە حکومڕانییەکی 16 بۆ 17 ساڵە کە ناتوانێ پێداویستییە سەرەتاییەکانیان بۆ دابین بکەن، بۆیە داوای ژیانێکی باشتردەکەن.
وتیشی: چوار ساڵ جارێك هه‌ڵبژاردن به‌ڕێوه‌ده‌چێت و ئه‌و نه‌وه‌یه به‌شداری له پرۆسه‌كه ده‌كه‌ن، به‌ڵام له ئه‌نجامدا ئه‌وه‌ی ده‌رده‌چێت، به ویستی ئه‌وان نییه.
باسی له‌وه‌شكرد، ره‌وشی عێراق جیاوازه له قۆناغی پێش ده‌ستپێكردنی خۆپیشاندانه‌كان له یه‌كی ئۆكتۆبه‌ردا و ئێستا ره‌وشێكی دیكه‌یه و ناگه‌ڕێته‌وه بۆ قۆناغی پێشتر.
لەبارەی رۆڵی هەرێمی کوردستان لە گرژییەکانی عێراق، سەرۆکی هەرێمی کوردستان وتی"هەمو هەوڵی هەرێمی کوردستان بۆ ئەوەیە دۆخی عێراق ئارام ببێتەوە و لەگەڵ بەغداش هەوڵەکانمان بەردەوامن بۆ دۆزینەوەی رێگەیەک بۆ دەرچوون لەو کێشەیە".
سەبارەت بە بڕیاری پەرلەمانی عێراق بۆ دەرکردنی هێزە بیانییەکان لە عێراق، نێچیرڤان بارزانی وتی، ئەوەی لە پەرلەمانی عێراق کرا کارێکی دروست نەبو، سەرهەڵدانەوەی داعش و تیرۆریزم لە عێراق مەترسییەکی جیدییە و عێراق پێویستی بە یارمەتیی نێودەوڵەتی و ئەمریکا هەیە و پێویستە هێزەکانی ئەمریکا لە عێراق بمێننەوە.