سەرۆكایەتی كۆمار رایگەیاند، بەرهەم ساڵح، سەرۆك كۆماری عێراق دوای سەردانە
كورتخایەنەكەی بۆ ئیتالیا ئەو وڵاتەی جێهێشتوەو بەرەو عێراق گەڕایەوە.
ئاوێنە: سەرۆكایەتی كۆماری عێراق لەبەیاننامەیەكدا رایگەیاند، بەرهەم ساڵح
ئەمڕۆ شەممە لە رۆما چاوی كەوتوە بە سێرجۆ ماتاریلا، سەرۆكی ئیتالیاو لەدیدارێكدا
دۆخی ئیقلیمی و نێودەوڵەتی و دوا پەرەسەندنەكانی ناوچەكەیان تاوتوێ كردوە.
هەروەها لەدیدارەكەدا تاوتوێی بڕیارەكەی ئەنجومەنی نوێنەرانی عێراقیان بۆ
كۆتاییهێنان بە بونی هێزە بیانییەكان لەو وڵاتە كردوەو جەختیان لە پێویستی
پشتیوانیكردنی سەقامگیری عێراق و رێزگرتن لە سەروەری و بڕیارە نیشتمانییەكەی
كردۆتەوە.
لای خۆیشییەوە
سەرۆكی ئیتاڵیا پشتیوانی وڵاتەكەی بۆ سەروەری و سەقامگیری عێراق دوپاتكردۆتەوەو
پەرۆشی خۆیشی بۆ زیاتركردنی هەوڵە نێودەوڵەتییەكان بۆ هێنانەدی ئاشتی و رێگرتن لە
گرژییەكان لەناوچەكە دوپاتكردۆتەوە.
بەیاننامەكەی سەرۆكایەتی كۆمار وتویەتی، بەرهەم ساڵح دوای كۆتاییهێنان بە سەردانە
كورتخایەنەكەی بۆ ئیتالیا كە لەمیانیدا چاوی بە پاپای ڤاتیكان و گەورە بەرپرسانی
ئیتالیا كەوت، ئەو وڵاتەی بەجێهێشتوەو بەرەو عێراق گەڕاوەتەوە.