بلندترین رێژا تووشبویێن نەخوشیا ئوتیزمێ ل دهوكێ د قەزا زاخو دا هاتیە تومار كرن هەتا نوكە سەنتەرەكێ حكومی تایبەت بڤێ نەخوشیێ ل قەزا ناڤبری نینە.
ئاوێنە، وارهێل نێروەی: ئەحمەد حەسەن، نوینەرێ قەزا زاخۆ یا كومەلا نەخوشیێن ئوتیزمێ ل دهوكێ بۆ " ئاوێنە " راگەهاند: ل گورەیی ئامارێن بەردەست بلندترین رێژا نەخوشێن ئوتیزمێ ل پارێزگەها دهوكێ ل قەزا هاتینە تومار كرن، نێزیكی 287 هەلگرێن نەخوشیا ئوتیزمێ ل زاخۆ هەنە تنێ 60 نەخوشان راپورتا لیژنا نوشداری هەیە و چاڤەرێنە بۆ نەخوشیێن دی ژی پشكنین بهێتە كرن دا رێژەیا نەخوشیێ بهێتە دەستنیشانكرن، و ئەڤە ژی رێژەیەكا مەزنە ل زاخۆ بەرامبەری هەموو دەڤەرێن دیتر هاتیە تومار كرن.
ناڤهاتی گوت ژی: ل سالا 2013 مە داخاز ڤەكرنا سەنتەرەكێ تایبەت ب نەخوشیێن ئوتیزمێ ل زاخۆ كریە، رەزاەندی ژی لسەر هاتە دان، لێ سالا 2014 ژبەر هاتنا رێژەیەكا مەزنا ئاوەریان بۆ زاخۆ ئەو بابەتە نەهاتە ئێكلا كرن و نەهاتیە ڤەكرن و جودا ژ هەموو قەزایێن دی پێدڤیە زاخۆ سەنتەرەكێ تایبەت هەبیت ژبەركو رێژەكا مەزن ژ هەلگرێن ڤێ نەخوشیێ هەیە.
ئەو ژی ئاشكرا كر: ئەو سەنتەرێن ئەهلی نوكە هاتینە ڤەكرن هەتا رادەیەكێ بازرگانی ب وان نەخوشان دهێتە كرن، ژبەركو پارەیەكێ باش ژ كەس وكارێن هەلگرێن وان نەخوشان دهێتە وەرگرتن و دشیانێن گەلەك نەخوشا دا نینە ئەو تێچوونا پارەی بدەن ل وان سەنتەرێن ئوتیزمێ، لەورا گەلەك پێدڤیە سەنتەرەكێ تایبەت یێ حكومی بۆ ڤان نەخوش بهێتە ڤەكرن.
گوت ژی: ل پارێزگەها دهوكێ 613 هەلگرێن نەخوشیا ئوتیزمێ هاتینە توماركرن، كو ڤان نەخوشا راپورتا لیژنا نوشداری هەیە.