لەئەنجامی سەردان و پشكنینە بەردەوامەكانی لیژنەی كۆگای سەربەلیژنە ‌هاوبەشەكانی قائیمقامیەتی سلێمانی بۆ دوكان و بازاڕ و شوێنەگشتیەكان وئەو شوێنانەی كاڵاوشمەك تیایدا عەمبار دەكرێت دەست بەسەر بڕێكی زۆر شامپۆ و بۆدرەی مناڵ و مادەی پاككەرەوەدا گیراوه.

ئاوێنە: لە راپۆرتی لیژنەی كۆگاكاندا هاتوە: لەلایەن لیژنەكە و بەهۆی خراپ بون و بەسەرچونیانەوە لە كۆگای ژاڵە دەست بەسەر دو هەزار و (640) شامپۆی مناڵ، (131) بۆدرەی مناڵ، (72) زاهی قاپ شوشتن و (100) پارچە موعەتەردا گیراوە‌.

رێنماییە تەندروستیەكان جەخت لەسەر بەكارنەهێنانی ئەو مادده ‌بەسەرچوانه دەكاتەوە، لەبەر ئەوەی كاریگەری راستەوخۆی لەسەر پێست و كۆئەندامی هەناسە و چاو هەیە،‌ زیانیان پێ دەگەیەنێت .

راپۆرتەكە ئەوەی خستۆتەروو: ئەو شامپۆ و پاككەرەوانه لیژنەكە دەستی بەسەردا گرتوە، جۆراو جۆرن و بەهۆی بەسەرچونیانەوە شیاوی بەكارهێنان نەماون، بۆیە بەفەرمانی قائیمقامی سلێمانی لەناوچەی دەرەوەی نیشتەجێبون لەلایەن لیژنەی لەناوبردنەوە بەشێوازی زانستی لەناودەبرێن و خاوەنەكەشی روبەروی رێكاری یاسایی دەكرێتەوە.

لیژنە هاوبەشەكان داوا لە دایكان وباوكان دەكات، لەكاتی كڕینی ئەو كالاوشمەك و پێداویستیانەی رۆژانە بەكاریدەهێنن بەوردی لە بەرواری دروستكردن و بەسەرچونییان دڵنیا بنەوە، لەكاتی هەبونی كاڵاوشمەكی خراپ و ماوەبەسەر چو لەڕێی (07708677777)‌ پەیوەندی بە لیژنە هاوبەشەكانەوە بكەن.