ئەمڕۆ یەكشەممە، یەكگرتوی ئیسلامی و بزوتنەوەی ئیسلامی كوردستان بەسەرۆكایەتی ئەمینداری گشتی یەكگرتو و رابەری گشتی بزوتنەوە كۆبونهوهو دوپاتیان کردەوە کە دەبێت حکومەتی هەرێمی كوردستان لەڕێگەی دانوستان لەگەڵ بەغدا بودجەو موچەی فەرمانبەران مسۆگەر بکات.
ئاوێنە: بەپێی راگەیەندراوێكی نوسینگەی ئەمینداری گشتی یەكگرتو، وەفدێكی باڵای یەكگرتوی ئیسلامی كوردستان بەسەرۆكایەتی سەلاحەدین بەهادین سەردانی بزوتنهوهی ئیسلامی كوردستانیان كرد و لەلایەن شێخ عیرفان عەبدولعەزیز ڕابەری بزوتنەوەی ئیسلامی و ژمارهیهك له ئهندامانی مهكتهبی سیاسی پێشوازییان لێكرا.
هێمای بۆ ئەوەش كردوە كە جگە لە ڕابەری گشتی بزوتنەوە و ئەمینداری گشتی یەکگرتو بەرپرسانی باڵای هەردولاش لەسەر ئاستی دەستەی کارگێڕی و ئەنجومەنی جێبەجێکردن و ئەندامانی سەرکردایەتی بەشداریان لەکۆبونەوەکە کرد.
لە کۆبونەوەکەدا هەردو جەختیان لە پتەوکردنی پەیوەندییەکان کردەوەو لێکنزیکبونەوەی لایەنە ئیسلامییەکان وەک زەرورەتێکی حەتمی دانرا.
لەبەشێکی تری کۆبونەوەکەدا یەکگرتو و بزوتنەوە پرسی خزمەتکردنی هاوڵاتیان و دابینکردنی پێداویستییەکانی ژیان و گوزەرانی خەڵک بە گرنگ زاندرا کە دەبێت لایەنە ئۆپۆزسیۆنەکان کاربۆ ئەم بابەتانە بکەن.
پرسی پەیوەندییەکانی عێراق و هەرێم یەکێکی تر بو لە تەوەرەکانی کۆبونەوەکەو بۆ ئەمەش دوپاتی ئەوەیان کردەوە کە دەبێت بەرپرسانی باڵای حکومەتی هەرێم و لایەنە سیاسییەکان لە رێگەی دانوستانی لێکتێگەیشتن مافەکانی کورد بەدەست بێنن و بودجەو موچەی فەرمانبەران مسۆگەر بکرێت.