سەرچاوەیەکی پزیشکی رایگەیاند کە خۆپیشاندەرێکی دیکە بەگوللـەی هێزە ئەمنییەکان لە ناوەڕاستی بەغداد کوژراوە.

ئاوێنە: سەرچاوەکە کە لە چوارچێوەی تیمە خۆبەشەکانی فریاکەوتن لە گۆڕەپانی تەحریر کار دەکات لە لێدوانێکدا بۆ وتی، "خۆپیشاندەرێکی دیکە لە گۆڕەپانی وەسبە ناوەڕاستی بەغداد گوللـەی هێزە ئەمنییەکان بەر سەری کەوتووە و بەهۆیەوە گیانی لەدەستداوە".

ئاشکرایشیکرد ژمارەی ئەو خۆپیشاندەرانەی کە دوێنێ یەکشەممە بەهۆی گازی فرمێسکڕیژ و گوللـەی هێزە ئەمنییەکان لە ناوەڕاستی بەغدا برینداربوون بەرزبووەتەوە بۆ ٣٣ کەس.

لای خۆیەوە چالاکوانی خۆپیشاندانەکانی بەغداد، عەدنان حەدیدی رایگەیاند کە دوێنێ هێزە ئەمنییەکان گوللـەی راستەقینە و گازی فرمێسکڕێژیان بەرامبەر بە خۆپیشاندەرانی گۆڕەپانی وەسبە بەکارهێنابوو.

عەدنان حەدیدی باسی لەوەیشکرد کە هەر دوێنێ هێزە ئەمنییەکان لە گۆڕەپانی خەلانی و وەسبە نزیکببوونەوە بۆ ئەوەی پردی سەنک بەڕووی هاتوچۆدا بکەنەوە کە لەلایەن خۆپیشاندەرانەوە داخراوە.

دوێنێ یەکشەممە کۆمیسیۆنی مافەکانی مرۆڤ لە عێراق رایگەیاندبوو کە لەمیانی دوو رۆژی رابردوودا، ١٢ خۆپیشاندەر لە بەغداد کوژراون.