بەپێی قسەی
دیاری حسێن، جێگری سەرۆكی ئەنجومەنی سەركردایەتی كەركوك - گەرمیانی پارتی، سبەی وەفدێكی
دانوستانكاری حكومەتی هەرێم سەردانی بەغدا دەكات بەمەبەستی گفتوگۆكردن سەبارەت بە
چارەسەركردنی دۆخی ناوچە جێناكۆكەكان.
ئاوێنە: دیاری حسێن،
ئەمڕۆ دوشەممە، بە ماڵپەڕی رەسمی حزبەكەی راگەیاند، دۆخی ناوچە كوردستانییەكانی دەرەوەی
ئیدارەی هەرێمی كوردستان لە هەمو رویەكەوە خراپە، بە تایبەت بۆ كورد، چونكە تەعریب
بەردەوامە و ستەمێكی زۆر لە كورد دەكرێت، هەروەها بە هۆی سەرهەڵدانەوەی داعشیشەوە،
دۆخی ئەمنی زۆر تێكچوە، بۆیە پێویستە هەردو حكومەتی هەرێم و بەغدا چارەیەك بۆ ئەم
دۆخە بدۆزنەوە.
دیاری حسێن وتیشی،
سبەی وەفدێكی حكومەتی هەرێمی كوردستان، كە هەمان وەفدی پێشوی دانوستانكاری حكومەتی
هەرێمی كوردستانە و لە چەند ئەندامێك پێكهاتوە، لەوانە ئومێد سەباح و خالید شوانی
و چەند ئەندامێكی دیكە، سەردانی بەغدا دەكەن بۆ ئەوەی گفتوگۆ لەبارەی دۆخی ناوچە
كوردستانییەكان لەگەڵ حكومەتی عێراق بكەن.
جێگری سەرۆكی ئەنجومەنی
سەركردایەتیی كەركوك - گەرمیانی پارتی ئەوەشی خستەڕو، راستە حكومەتی عێراق كاربەڕێكەرە،
بەڵام دادگاكان كاری خۆیان دەكەن و دەكرێ هەمو پرسەكان لە رێگەی دادگاوە یەكلابكرێنەوە.