عادل
عەبدولمەهدی، سەرۆك وەزیرانی عێراق و مایك پۆمپیۆ، وەزیری دەرەوەی ئەمریكا
لەپەیوەندییەكی تەلەفۆنیدا ئیدانەی دەستدرێژییەكان بۆ سەر باڵیۆزخانەی ئەمریكا دەكەن
و رێكار بگیرێتەبەر بۆ رێگەگرتن لە دەستدرێژیكردنە سەر نوێنەرایەتییە
دیپلۆماتییەكان.
ئاوێنە: بەپێی
راگەیەندراوێكی نوسینگەكەی، ئێوارەی ئەمڕۆ دوشەممە، عادل عەبدولمەهدی پەیوەندییەكی
تەلەفۆنی لەلایەن مایك پۆمپیۆ، وەزیری دەرەوەی ئەمریكاوە پێگەیشتوە.
لەمیانی پەیوەندییە تەلەفۆنییەكەدا هەردولا
جەختیان لەسەر پەیوەندییە دۆستانەكانی نێوان هەردو وڵات و ئیدانەكردنی
دەستدرێژییەكان بۆ سەر باڵیۆزخانەی ئەمریكا لە بەغدا كردۆتەوە.
هەروەك جەختیشیان لەسەر بەهێزكردنی رێكارەكانی
ئەو هێزە عێراقیانە كردۆتەوە كە بەرپرسن لە پاراستنی باڵیۆزخانەكە.
هەروەها پێداگریشیان كردوە لەسەر
بەدواداچونی لێكۆڵینەوەكان و گرتنەبەری رێكار بۆ رێگریكردن لە دەستدرێژییەكان بۆ
سەر نوێنەرایەتییە دیپلۆماتییەكان و روبەڕوكردنەوەی ئەنجامدەرانی دەستدرێژییەكان
بە یاسا.
لای خۆیشییەوە سەرۆك وەزیرانی عێراق
ئەتكیدی لەسەر گرنگی هێوركردنەوەی ناوچەكەو رێزگرتنی هەموان لە سەروەری عێراق و
بڕیارەكانی و دەستوەرنەدان لە كاروباری ناوخۆی وڵات و هەوڵی جدی بۆ بەدیهێنانی
ئەمانە كردۆتەوە.
مایك پۆمپیۆ، وەزیری دەرەوەی ئەمریكاش
جەختی لە ئامادەیی وڵاتەكەی بۆ ئەنجامدانی گفتوگۆی جدی سەبارەت بە بونی هێزە
بیانییەكان لەعێراق و هاریكاریكردن بۆ بەدیهێنانی سەروەری عێراق كردۆتەوە.