2020-02-03   478     
کۆمسیۆنی باڵای مافەکانی مرۆڤ لە عێراق رایگەیاند، ''لەمیانی خۆپیشاندانەکانی دژبە حکوومەت و پارتە دەسەڵاتدارەکاندا، تا ئێستا ٥٥٦ کەس کوژراون''.
ئاوێنه: لە روونکردنەوەیەکدا کۆمسیۆنی باڵای مافەکانی مرۆڤ لە عێراق رایگەیاند، ئەوەی بەبەڵگەکردووە کە لەمیانی خۆپیشاندانەکانی دژبە حکوومەت و پارتە دەسەڵاتدارەکاندا، تا ئێستا ٥٥٦ کەس کوژراون و لەو بارەیەوە عەلی بەیاتی، ئەندامی کۆمسیۆنی باڵای مافەکانی مرۆڤ ئاماژەی بەوەکردووە کە بەپێی راپۆرتی لیژنەی لێکۆڵینەوەی سەربە کۆمسیۆنەکەیان، لەمیانی خۆپیشاندانەکاندا کە له سەرەتای مانگی تشرینی یەکەمی ساڵی رابردووەوە ئەنجامدەدرێن و تا ئێستا بەردەوامە، ٥٥٦ کەس کوژراون.
هاوکات عەلی بەیاتی ئەوەشی وتووە، ''هەر کەسێک گومانی لەوە ژمارەیەدا هەیە، با وەڵامی هەبێت و ژمارە راستەقینەکە بۆ رای گشتی بڵاوبکاتەوە''.
شایەنی باسە ئەمەش لە کاتێکدایە پێشتر رێکخراوی لێبووردنی نێودەوڵەتی و سەرکۆماری عێراق، بەرهەم ساڵح، رایانگەیاندبوو، لە سەرەتای خۆپیشاندانەکانهوه تا ئێستا، ٦٠٠ کەس کوژراون.
لە یەکی تشرینی ساڵی رابردووە خۆپیشاندان دژبە حکوومەت و پارتە دەسەڵاتدارەکان لە عێراق ئەنجام دەرێت و تا ئێستا بەردەوامە.