2020-02-04   565     
هادی عامری، سەرۆکی هاوپەیمانیی فەتح لە عێراق رایگەیاند، ''خراپەکاریی بەرامبەر موقتەدا سەدر، رابەری رەوتی سەدر رەتدەکەینەوە''.
ئاوێنه: هادی عامری کە هاوکات سکرتێری گشتی رێکخراوی بەدرە لە عێراق لە راگەیەیەندراوێکدا رایگەیاند "خراپەکاریی چەند بەکرێگیراوێک بەرامبەر سیمبوولە ئایینییەکان بەتایبەت سەید موقتەدا سەدر، رابەری رەوتی سەدر کە لەلایەن نووسەر و سایتی بەکرێگیراوەوە دووچاری خراپەکاریی دەبێتەوە، رەتدەکەینەوە".
سەرۆکی هاوپەیمانیی فەتح ساڵانێکە لەگەڵ رابەری رەوتی سەدر ناکۆکە، ئەم هەڵوێستەیشی دوای رێککەوتنی هەردوولایان هات لەسەر بەربژێرکردنی محەممەد تۆفیق عەللاوی بۆ سەرۆکایەتی وەزیرانی عێراق و راسپاردنی لەلایەن سەرۆککۆمارەوە بۆ پێکهێنانی کابینەی نوێی حکومەتی عێراق.
جیا لە بەغداش، لە هەریەک لە بابل، زیقار، دیوانییە، نەجەف، کەربەلا و چەند شارێکی دیکە خۆپیشاندان بەردەوامە و درووشمی دژ بە رێبەری رەوتی سەدر دەڵێنەوە، لە پارێزگای نەجەفیش، کڵاوشینەکانی سەر بە موقتەدا سەدر، لەگەڵ خۆپێشاندەران گەیشتوونەتە رێککەوتن، بۆ ئەوەی لە گۆڕەپانەکانی خۆپیشاندان بکشێنەوە.