شانەی راگەیاندنی ئەمنی عێراق سەبارەت بە هێرشە موشەكییەكەی ئەمشەو بۆ سەر بنكەی سەربازی "كەی وەن" لە پارێزگای كەركوك رایگەیاند، موشەكێك لەنێو بنكە سەربازییەكە كەوتۆتە خوارەوەو دەست بەسەر 11 موشەكی دیكەدا گیراوە.
ئاوێنە: شانەی راگەیاندنی ئەمنی عێراق، لەبەیاننامەیەكی كورتدا لەهەژماری خۆی لە تویتەر رایگەیاند، موشەكێك لەنێو بنكەی سەربازیی كەی وەن لە پارێزگای كەركوك كەوتۆتە خوارەوەو زیانی لێ نەكەوتۆتەوە.
ئاماژەی بەوەشداوە كە هێزە ئەمنییەكان دەستیان بە پڕۆسەی گەڕان بەدوای بكەرانی هێرشەكەدا كردوە.
ئەوەشی خستۆتەڕو كە دەست بەسەر سەكۆیەكی هەڵدانی موشەكدا گیراوە كە 11 موشەكی لەسەر بوە كە هێشتا نەتەقێنراون.
بنكەی سەربازیی "كەی وەن" لە پارێزگای كەركوك هێزی ئەمریكی لەخۆدەگرێت و پێشتریش كراوەتە ئامانجی هێرشی موشەكی كە ئەمریكا، گروپە چەكدارەكانی نزیك لە ئێرانی بە هێرشەكە تۆمەتبار كردبو.