لەمیانی رووبەڕووبوونەوەکانی دوێنێ دووشەممە نێوان خۆپشاندەران لە ناوەڕاستی بەغداد و هێزە ئەمنییەکاندا، ١٢ خۆپیشاندەر برینداربوون.

ئاوێنە: هێزە ئەمنییەکانی عێراق ئاشکرایان کرد کە لەمیانی رووبەڕووبوونەوەکانی دوێنێ دووشەممە نێوان خۆپيشاندەران لە ناوەڕاستی بەغداد و هێزە ئەمنییەکاندا، ١٢ خۆپیشاندەر برینداربوون.

لەوبارەوە سەرچاوەیەکی پزیشکی رایگەیاند کە دوێنێ رووبەڕووبوونەوە لەنێوان خۆپیشاندەران لە گۆڕەپانی تەحریر و هێزە ئەمنییەکاندا روویداوە.

بەوتەی سەرچاوەکە لەمیانی رووبەڕووبوونەوە و پێکدادانەکاندا، هێزە ئەمنییەکان گازی فرمیسکڕێژیان بەرامبەر بە خۆپیشاندەران بەکارهێناوە کە بە هۆیەوە ١٢ خۆپیشاندەر برینداربوون.

هاوکات شایەتحاڵەکان رایانگەیاند کە ئەو خۆپیشاندەرانە لە ئاکامی تەقەکردن و بەکارهێنانی گازی فرمێسکڕێژ لەلایەن هێزە ئەمنییەکانەوە برینداربوون.

هەر لەوبارەوە لیوا عەبدولکەریم خەڵەف، وتەبێژی فەرماندەی گشتی هێزە چەکدارەکانی عێراق رایگەیاند کە دوای دەنگدانی ئەنجوومەنی نوێنەران لەسەر کابینەی حکوومەتەکەی محەمەد تۆفیق عەللاوی هێزە ئەمنییەکان هەوڵ نادەن کۆتایی بهێنن بە خۆپیشاندانەکان.

لیوا عەبدولکەریم خەڵەف لە لێداونێکدا بۆ کەناڵی نیمچە فەرمی عێراقییە ئەوەی وتووە “خۆپیشاندان مافێکی رەوای هەموو هاووڵاتییانە وەک لە دەستوور و یاسادا هاتووە”.

پێشتر نێردەی نەتەوە یەکگرتووەکان لە عێراق رایگەیاندبوو، ئیدانەی بەکارهێنانی چەکی رواکردن دژبە خۆپیشاندەرانی بەغداد و شارەکانی دیکەی عێراق دەکات لەلایەن هێزە ئەمنییەکانەوە کە بە هۆیەوە لەمیانی چەند رۆژی رابردوودا، دەیان خۆپیشاندەر برینداربوون.