سوپای نیشتمانی لیبیا سەربە خەلیفە حەفتەر ئەمڕۆ سێشەممە رایگەیاند، بۆردومانی كەشتییەكی توركیایان لە بەندەری تەرابلوس كردوە كە چەك و كەرەستەی سەربازی هەڵگرتوە.
ئاوێنە: ناوەندی راگەیاندنی ژوری ئۆپەراسیۆنەكانی "كەرامە" سەربە سوپای نیشتمانی لیبیا لە بەیاننامەیەكی كورتدا رایگەیاند، بەهۆی بۆردومانی كەشتییەوە ئاگر لە كەشتییە توركییەكە بەرزبۆتەوە كە چەك و كەرەستەی سەربازی هەڵگرتوەو سەرلەبەیانی ئەمڕۆ لە بەندەری تەرابلوس لەنگەری گرتوە.
بەگوێرەی هەواڵێكی ئاژانسی رۆیتەزر، غەسان سەلامە، نێردەی نەتەوە یەكگرتوەكان بۆ كاروباری لیبیا، رایگەیاند، ئەمڕۆ سێشەممە بەندەری تەرابلوس روبەڕوی هێرش بۆتەوە، بەبێ ئەوەی وردەكاری زیاتر بخاتەڕو.
پەیامنێری رۆیتەرز لەتەرابلوس وتویەتی، دوكەڵێكی چڕ لە بەندەرەكەوە بەرزبۆتەوە. لەزاری سەرچاوەیەكی بەندەرەكەشەوە وتویەتی، لەهێرشەكەدا كۆگایەك بەركەوتوە.
لەلایەكی دیكەوە هێزەكانی حكومەتی ویفاقی نیشتمانی بەسەرۆكایەتی فایز سەڕاج لەبەیاننامەیەكی كورتدا رایگەیاند، هێزەكانی خەلیفە حەفتەر بە موشەك هێرشیان كردۆتەوە سەر بەندەری تەرابلوس و ئەوەشی بە "دوبارە پێشێلكردنی ئاگربەست ناوبردوە لەلایەن هێزەكانی حەفتەرەوە."
بەیاننامەكەی هێزەكانی حكومەتی ویفاقی نیشتمانی هیچ ئاماژەیەكی بە زیانە ماددی و گیانییەكانی هێرشەكە نەكردوە.
سوپای نیشتمانی لیبیا سەربە خەلیفە حەفتەر لەهەوڵی كۆنترۆڵكردنی تەرابلوسی پایتەختدا كە لەژێر دەستی حكومەتی ویفاقی نیشتمانیدایە بە سەرۆكایەتی فایز سەڕاج.