شاسوار عەبدولواحید رۆژی شەممەی داهاتوی بۆ خۆپیشاندانی سەرتاسەری دیاریكرد
  2020-02-18       1389       

شاسوار عەبدولواحید، سەرۆکی جوڵانەوەی نەوەی نوێ کاتژمێر ٣ی پاشنیوەرۆی شەممەی داھاتوی بۆ خۆپیشاندان لە شارەکانی ھەرێم دیاریکردو داواشی لە هاوڵاتیان كرد بەشداری خۆپیشاندانەكان بكەن و وتیشی"خۆم و خێزانەکەم بەشدار دەبین لە خۆپیشاندانەکەدا."

ئاوێنە: شاسوار عەبدولواحید، سەرۆکی جوڵانەوەی نەوەی نوێ، ئێوارەی ئەمڕۆ سێشەممە، لەپەیامێكی ڤیدیۆییدا لەڕێگەی لاپەڕەی خۆی لە فەیسبوك، رایگەیاند،"ئیتر بەسە بێ دەنگی، شەممە کاتژمێر ٣:٠٠ ی پاش نیوەڕۆ خۆم و خێزانم بەشدارین لە خۆپیشاندانەکاندا. خۆپیشاندان لە هەر چوار پارێزگاکەی هەرێم ئەنجام دەدرێت (هەولێر، سلێمانی، دهۆک، هەڵەبجە)."

وتیشی"بەشداریکردن لە خۆپیشاندان لەبەر تاکە کەسێک نییە و لەبەر هیچ هێز و لایەنێکی سیاسی نییە، بەڵکو لەبەر ئەو دۆخە خراپەیە کە بەسەر هاوڵاتییاندا هاتوە."

سەرۆكی جوڵانەوەی نەوەی نوێ وتیشی"بەشداریکردنمان گەیاندنی پەیامێکە بە دەسەڵات کە ئێمە وەکو میللەتی کورد و هاوڵاتییانی هەرێمی کوردستان ناڕازین بەرامبەر بە نەبونی خزمەتگوزاریی و ئەو هەمو ناهەقییەی کە هەیە."

ئاماژەی بەوەشدا، "بەشداریکردن لە خۆپیشاندانەکەدا مانای ناڕازیبونە بەو هەمو بێکارییەی کە گەنجەکانمانی تێدایە، بەو هەمو ناڕەحەتییەی کاسبکاران و دوکاندارانی تێدایە و ناڕازیبونە بە موچەی فەرمانبەران و پاشەکەوتی موچە."

باسی لەوەشکرد، "ئەگەر تەنانەت بۆ یەک کاتژمێریش بێت وەرنە سەر شەقامەکان و پەیامی ناڕازیی خۆتان بە دەسەڵاتداران بگەیەنن."

 

زۆرترین بینراو
© 2018 Awene Online, Inc. All Rights Reserved.
×