بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان رایگەیاند، وەزارەتەكەیان قەدەغەی هێنانی زیندەوەری ئاوی و باڵندەو ئاژەڵی جوانی دەكات لەو وڵاتانەی ڤایرۆسی كۆرۆنای تێدا بڵاوبۆتەوە لەوانە كۆماری ئیسلامی ئێران.
ئاوێنە: بێگەرد تاڵەبانی، ئەمڕۆ هەینی، لە راگەیەندراوێكدا بڵاویكردەوە، بەپشت بەستن بە زانیاریەکانی رێکخراوی تەندروستی جیهانی و رێکخراوەکانی تەندروستی ئاژەڵی و رێکارەکانی لیژنەی باڵای رێگری لە ڤایرۆسی كۆرۆنا لە حکومەتی هەرێم كە پەیوەستن بە وەزارەتی کشتوکاڵ و سەرچاوەکانی ئاوی حکومەتی هەرێم ژورێکی تایبەتمان پێکهێنا لە بەڕێوەبەرایەتی گشتی سامانی ئاژەڵ و ڤێتێرنەری.
هێمای بۆ ئەوەش كردوە، دوێنێ پێنج شەممە و ئەمڕۆ هەینی لیژنەکە کۆبونەوەیان ئەنجامدا، تیایدا چەند رێگایەک گیراوەتەبەر.
بەپێی راگەیەندراوەكە یەكێك لە رێكارەكان بریتییە لە قەدەغەکردنی زیندەوەری ئاوی و باڵندەو ئاژەڵی جوانی لەو وڵاتانەی بەپێی رێکخراوی تەندروستی جیهانی ڤایرۆسی كۆرۆنا سەری هەڵداوە لەوانە کۆماری ئیسلامی ئێران.
هەروەها رێكارێكی دی بریتییە لە هەڵمەتی رشاندنی هۆڵەکانی ئاژەڵ و ئەو شوێنانەی ئاژەڵ و باڵندەی تیایدا دەفرۆشێت.
ئاگادار کردنەوەی نۆرینگە و شوێنەکانی کەرتی تایبەت کە مامەڵە بە باڵندەو ئاژەڵی جوانی دەکەن بە رشاندنی شوێنەکانیانیش یەكێكی دیكەیە لە رێكارەكان.
هەروەها رێكارێكی دیكەشیان پێکهێنانی لیژنەیەکی هاوبەشە لەنێوان بەڕێوەبەرایەتی ڤێتێرنەری پارێزگاکان، یەکە ئیداریەکان و فەرمانگاکانی تەندروستی، ژینگەو لایەنە پەیوەندارەکان تایبەت بەم ڤایرۆسە.
وتوشیەتی"رۆژانە بەدواداچوونی ورد بکرێت بۆ زانینی بڵاوبونەوەی ڤایرۆسەکە لە وڵاتان بۆ گرتنەبەری رێکاری قەدەغەکردنی هاوردەی ئاژەڵ و باڵندە بەو وڵاتانە. هەروەها ئەنجامدانی هەڵمەتی هۆشیاری هاوڵاتیان پەیوەندار بە ڤێتێرنەری."