وەزارەتی کشتوکاڵ چەند بڕیارێکی تایبەت بە ڤایرۆسی کۆرۆنا دەرکرد
  2020-02-22       606       
وەزارەتی کشتوکاڵ و سەرچاوەکانی ئاو لە حکومەتی هەرێم چەند بڕیارێکی دەرکرد تایبەت بە ڤایرۆسی کۆرۆنای نوێ.

ئاوێنە: بێگەرد تاڵەبانی، وەزیری کشتوکاڵ و سەرچاوەکانی ئاو لەحکومەتی هەرێم لیژنەیەکی تایبەتی پێکهێنا، لیژنەکە کۆبوەوەو چەند بڕیارێکی دەرکرد و دوێنێ هەینیش بێگەرد تاڵەبانی، وەزیری کشتوکاڵ و سەرچاوەکانی ئاو واژۆی لەسەر بڕیارەکان کرد.

لە بڕیارەکان هاتووە ، بەپشت بەستن بە زانیاریەکانی رێکخراوی تەندروستی جیهانی و رێکخراوەکانی تەندروستی ئاژەڵی و رێکارەکانی لیژنەی باڵای رێگری لە ڤایرۆسی کۆڤید-19 (کۆرۆنا) COVID-19 لە حکومەتی هەرێم، پەیوەستن بە وەزارەتی کشتوکاڵ و سەرچاوەکانی ئاوی حکومەتی هەرێم ژورێکی تایبەتمان پێکهێنا لە بەڕێوەبەرایەتی گشتی سامانی ئاژەڵ و ڤێتێرنەری.

قەدەغەکردنی زیندەوەری ئاوی و باڵندەو ئاژەڵی جوانی لەو وڵاتانەی بەپێی رێکخراوی تەندروستی جیهانی ڤایرۆسی کۆڤید-19 (کۆرۆنا) COVID-19 سەری هەڵداوە لەوانە کۆماری ئیسلامی ئێران.

هەڵمەتی رشاندنی هۆڵەکانی ئاژەڵ و ئەو شوێنانەی ئاژەڵ و باڵندەی تیایدا دەفرۆشێت.

ئاگادار کردنەوەی نۆرینگە و شوێنەکانی کەرتی تایبەت کە مامەڵە بە باڵندەو ئاژەڵی جوانی دەکەن بە رشاندنی شوێنەکانیان.

پێکهێنانی لیژنەیەکی هاوبەش لەنێوان بەڕێوەبەرایەتی ڤێتێرنەری پارێزگاکان، یەکە ئیداریەکان و فەرمانگاکانی تەندروستی، ژینگەو لایەنە پەیوەندارەکان تایبەت بەم ڤایرۆسە.

رۆژانە بەدواداچوونی ورد بکرێت بۆ زانینی بڵاوبونەوەی ڤایرۆسەکە لە وڵاتان بۆ گرتنەبەری رێکاری قەدەغەکردنی هاوردەی ئاژەڵ و باڵندە بەو وڵاتانە.

هەروەها ئەنجامدانی هەڵمەتی هۆشیاری هاوڵاتیان پەیوەندار بە ڤێتێرنەری.
زۆرترین بینراو
© 2018 Awene Online, Inc. All Rights Reserved.
×