وەزارەتی بەگری ئەمریکا (پنتاگۆن) رایگەیاند، ژمارەی ئەو سەربازە ئەمریکیانەی بەهۆی هێرشەکانی ئێران لە کانونی دوەمی ئەمساڵدا بۆ سەر بنکەی عەین ئەسەد برینداربون گەیشتوەتە 110 سەرباز.

ئاوێنە: لە راگەیەندراوەکەی پنتاگۆندا ئاماژە بەوەشکراوە، دوای ئەوەی پشکنین بۆ سەرجەم برینداربوەکان کراوە و بەشێكیان بە ئاستێکی کەم زیان بە سەریان کەوتوە، لە هەمانکاتدا " 77 سەرباز گەڕاونەتەوە خزمەتی سەربازی".

ئەوەش هاتوە، بە ئامانجی هەڵسەنگاندنی دۆخی تەندروستیان 35 سەربازی دیکە رەوانەی ئەڵمانیا کراون و 25 سەربازی دیکەش بۆ ئەمریکا گەڕێندراونەوە.

بەرزبونەوەی ژمارەی برینداربوان لەنێو سەربازانی ئەمریکا کاتێکدایە، شەوی حەوتی کانونی دوەمی ئەمساڵ ئێران لە رێگەی موشەکەوە بنکەی عەین ئەسەدی لە پارێزگای ئەنباری کردە ئامانج، دواتریش دۆناڵد ترەمپ سەرۆکی ویلایەتە یەکگرتوەکانی ئەمریکا رایگەیاند، لە هێرشەکەدا هیچ سەربازێکی ئەمریکی بریندار نەبوە.