سلێمانی..بۆ خۆپارێزی لە كۆرۆنا، چەند رێنماییەك بۆ ئیدارەی مزگەوتەكان دەرچو
  2020-02-28       392       

بۆردی وتاری ئایینی و زانستی شاری سلێمانی لە بەڕێوەبەرایەتی گشتی ئەوقاف، چەند رێنماییەك بۆ خۆپاراستن لە ڤایرۆسی كۆرۆنا، بۆ مزگەوتەكان دەركردو دەشڵێت، بڕیارماندا وتاری هەینی لەم هەفتەیەوە لە 10 خولەك زیاتر نەبێت.

ئاوێنە: بەڕێوەبەرایەتی گشتی ئەوقاف و كاروباری ئایینی پارێزگای سلێمانی لەڕاگەیەندراوێكدا بڵاویكردەوە، ئەندامانی بۆردی وتاری ئایینی و زانستی شاری سلێمانی لە بەڕێوەبەرایەتییەكەیان سەبارەت بە پەتای كۆرۆنا چەند بڕیارو رێنماییەكان دەركردوەو داوایان كردوە لەوتارو ئیدارەی مزگەوتەکاندا کاری پێبکەن.

رێنمایی و بڕیارەكان:

۱/ بڕیارماندا وتاری هەینی لەم هەفتەیەوە لە ۱۰ خولەک زیاتر نەبێت، ئەویش بۆ باسکردنی ڕێگاکانی خۆپارێزی، ڕێنمایی،ئامۆژگاری، ورەبەخشین.
۲/ ژنان بەشداری نوێژی بەکۆمەڵ ناکەن، سود لەهۆڵی ژنان وەربگرن بۆ نوێژخوێنانی تر تاکو قەرەباڵغی هۆڵە سەرەکیەکان کەم بکرێنەوە.
۳/نابێت ڕێگەبدرێت بە منداڵانی ناباڵق بێنە هۆڵی نوێژ خوێنانەوە، ئەمەش بۆ پاراستنیان.
٤/ هەوڵ بدەن پیرو بەساڵاچوان، نەخۆش، بەشداری نوێژی بەکۆمەڵ نەکەن.
٥/ داوا لە خەڵک بکەن چەندی دەکرێت بە دەمامکەوە بێنە ناو مزگەوت.
٦/ داوا لە خەڵک بکەن لەماڵەوە دەست نوێژ بگرن.
۷/ داوا لەخەڵک بکەن پرسە لە مزگەوت و هۆڵەکان دانەنێن، با کەس گللەیی نەکات لە نەهاتنیان بۆ پرسەکان، دەکرێت لەڕێگای تلفون، نامەوە سەرەخۆشی لەخاوەن مردو بکرێت. داوابکرێت، لەئێستادا شەکراوخواردنەوە، ئاهەنگ گێڕان ڕابگیرێت.
٨/ داوا لەحکومەت و لایەنی بەرپرسیار دەکەین نێرگەلەو یانەی شەوانەو شوێنی مەیخانەو گشت ئەو شوێنانە دابخرێت، کە خەڵکی لێ کۆدەبێتەوە.
۹/ بەڕێوەبەری مزگەوتەکان خۆیان بەرپرسیارن لە دابینکردنی سابون و شامپۆو مەوادی (تعقیم)، چاودێریکردنی پاکوخاوێنی مزگەوت، دەوامی کارمەندان.
۱۰/ حوجرەو بنکەکانی قورئان خوێندن تا کاتی نادیار ڕادەگیرێن.
۱۱/ چاوەڕوانی (الانتضار) بۆ نوێژی سونەت نەمێنێت، دەتوانرێت نوێژی سونەت لەماڵەوە بکرێت.

زۆرترین بینراو
© 2018 Awene Online, Inc. All Rights Reserved.
×