هەڵوێستی ئەمریكا لەسەر بۆردومانی سەربازانی توركیا لەئیدلب
  2020-02-28       1788       

لەگەڵ ئەوەی وەزارەتی دەرەوەی ئەمریكا نیگەرانی خۆی سەبارەت بە هێرشكردنە سەر سەربازانی توركیا لە ئیدلب راگەیاند، بەڵام نوێنەری ئەمریكا لە هاوپەیمانی ناتۆ وتی: هیوادارم ئەردۆغان بۆی دەربكەوێت كە كێ هاوپەیمانی راستەقینەیەتی.

ئاوێنە: دوای ئەوەی توركیا رایگەیاند، لە هێرشێكی سوپای سوریادا، 33 سەربازی لە ئیدلب كوژراون. وەزارەتی دەرەوەی ئەمریكا لە بەیاننامەیەكدا نیگەرانی خۆی سەبارەت بە روداوەكە راگەیاند و وتی"بۆ پشتڕاستکردنەوەی پێشھاتەکان و وەرگرتنی زانیاری، لەگەڵ بەپرسانی تورکیا لە پەیوەندیداین."

وەزارەتی دەرەوەی ئەمریكا وتوشیەتی"بانگھێشتی رژێمی ئەسەد و ھێزەکانی پشتیوانەكانی ئەسەد وەک روسیا و ئێران دەکەین کە بەزوترین کات کۆتایی بەم ھێرشە ناپاکانە بھێنن."

جەختیشی كردۆتەوە"ھەروەکو سەرۆک ترەمپ و وەزیر مایک پۆمپیۆ وتویانە، ھەڵسەنگاندن لەسەر بژاردە پەیوەندیدارەكان بە پشتیوانیکردنی تورکیا بە باشترین شێوە لەم قەیرانە دەکەین."

هەروەها بەیڵی خوچیسن، نوێنەری ئەمریكا لە هاوپەیمانی ناتۆ لەوەڵامی ئەوەی كە "روسیا" لە سوریا هێرشی كردۆتە سەر هێزەكانی توركیا، وتی"ئەگەر وابێت، کەواتە هیوادارم ئەردۆغان یان هەر کەسێکی دیکە بۆی دەربکەوێت کە کێ هاوپەیمانی ڕاستەقینەیەتی و کێش هاوپەیمانی ڕاستەقینەی نییە."

هەروەها ئەوەشی خستەڕو"تەنیا شت کە پەیوەندییەکانی لەگەڵ تورکیا قورس کرد گرێبەستی ئێس 400 بو، ئێمە بە هەمو ڕێگایەک هەوڵماندا بۆ هاوپەیمانەکەمانی ڕون بکەینەوە کە ئێمە دەمانەوێت لە هاوپەیمانێتیەکەدا بمێنێتەوە، بەڵام ناتوانێت سیستمی بەرگری موشەکی ڕوسی لە ناوەڕاستی وڵاتەکەیدا جێگیربکات و لە هەمان کاتیشدا لەگەڵ هاوپەیمانەکانی پێکەوە کاربکات."


زۆرترین بینراو
© 2018 Awene Online, Inc. All Rights Reserved.
×