توركیا رەتیدەكاتەوە لەكاتی ئەنجامدانی هێرشەكەدا بۆ سەر سەربازانی وڵاتەكەی لە ئیدلب كە تێیدا 33 سەرباز كوژران، هیچ گروپێكی چەكداری ئۆپۆزسیۆن لەدەوروبەری یەكەكانی سوپای وڵاتەكەیدا بوبن. ئەوەش وەك وەڵامدانەوەی وەزارەتی بەرگری روسیا كە وتبوی، ئەو سەربازانەی توركیا كە بۆردومان كراون لە نێو ریزی چەكدارانی "تیرۆریست"دا بون.

ئاوێنە: خڵوسی ئاكار، وەزیری بەرگریی تورکیا، ئەمڕۆ هەینی، رایگەیاند "لە کاتی ئەنجامدانی ئەو ھێرشەدا ھیچ گروپێکی چەکدار لە دەوروبەری یەکەکانماندا نەبون".

ئاکار ئەوەشی خستەڕو''سەرەڕای ئەوەی دوای یەکەم ھێرش جارێکی دیکە ھۆشداریدرا ھێرشەکە ھەر بەردەوام بو، لە کاتی ئەو ھێرشەدا ئۆتۆمبێلەکانی فریاکەوتنیش کرانە ئامانج."

وەزیری بەرگریی تورکیا، وتیشی"لە دوای ھێرشەکەوە لە رێگای فڕۆکە، فڕۆکەی بێفڕۆکەوان و ئامێرە سەربازییەکانەوە زیاتر لە ٢٠٠ ئامانجی رژێممان بە چڕی بۆردومان کردوە".

ئەوەش لەكاتێكدایە پێشتر وەزارەتی بەرگری روسیا، رایگەیاند، بۆردومانەكەی سوپای سوریا لە ئیدلب بۆ سەر پێگەی چەكدارە "تیرۆریستەكان" بوەو دواتر رون بۆتەوە كە سەربازانی توركیا لەنێو ریزەكانی ئەو چەكدارانەدا بون.

وەزارەتی بەرگری روسیا جەختی كردبوەوە كە "نەدەبو هیچ یەكەیەكی توركی لەشوێنی بۆردومانەكەی سوریا بونایە."