2020-03-01 447
وەزارەتی تەندروستی عێراق رایگەیاند، ''دوای تۆمارکردنی چەند حاڵەتێکی توشبون بە ڤایرۆسی کۆرۆنا لە وڵاتدا، داوا لەسەرجەم هاوڵاتیان و خۆپیشاندەرانی گۆڕەپانەکان دەکەن لە پێناوی پاراستنی تەندروستی هەمو لایەک لەم کاتەدا سەرجەم گردبونەوە جەماوەرییەکان رابگیرێن''.
ئاوێنه: وەزارەتی تەندروستی عێراق لە راگەیەندراوێکدا رایگەیاند، دوای ئەوەی لە 24 کاتژمێری رابردودا، چەند حاڵەتێکی نوێی توشبون بە کۆرۆنا لە بەغدا تۆمارکراوە، داوا لە گەلی عێراق دەکەن کە پێویستە پابەندی رێنماییەکانی پەیوەست بە خۆپارێزی و دروستنەکردنی کۆڕوکۆبونەوەی فراوان بن، ئەوەش بە ئامانجی بەرگرتن لە بڵابونەوەی زیاتری پەتای کۆرۆنا.
ئاماژەی بەوەشکردوە، وەزارەتی تەندروستی عێراق بەردەوامە لە چارەسەرکردنی بریندارانی خۆپیشاندانەکان، لە روانگەی تەندروستییەوە داوای راگرتنی هەمو جۆرە کۆبونەوەیەکی خەڵک لە گۆڕەپانەکان دەکەن، ئەوەش لە پێناوی پاراستنی هاوڵاتیان و خێزانەکانیان.
بە گوێرەی دوایین ئاماری وەزارەتی تەندروستی عێراق، تاوەکو ئێستا لەسەرانسەری وڵاتدا 13 حاڵەتی توشبون بە ڤایرۆسی کۆرۆنا تۆمارکراون و داواشیان لە هاوڵاتیان كردوە پابەندبن بە رێنماییە فەرمییەكانەوە بۆ خۆپاراستن لە توشبون بەو پەتایەی کە لە بەشێكی زۆر لە وڵاتانی جیهاندا تەشەنەی سەندوە.