2020-03-07   600     
سەرچاوەیەکی تەندروستی عێراق رایگەیاند، حکومەتی چین تیمێک و فڕۆکەیەکی پێداویستی تەندروستی بەمەبەستی هاوکاریکردنی عێراق رەوانەی بەغدای پایتەخت دەکات، کە تایبەتمەندن لە بواری روبەڕوبونەوەی کۆرۆنا.
ئاوێنه: یاسین مەعموری، سەرۆکی خاچی سوری عێراق لە راگەیەندراوێکدا رایگەیاند، رۆژی سێی ئەم مانگە رێکخراوی خاچی سوری چین ئاگاداریکردونەتەوە، کە ژمارەیەک کەلوپەلی تەندروستی تایبەت بە روبەروبونەوەی کۆرۆنا رەوانەی عێراق دەکەن، بڕیاریشە ئەمڕۆ یەکەمین کاروانی هاوکارییەکان بگاتە بەغدا.
ئاماژەی بەوەشکردوە، هاوکارییەکان ئامێری هەناسەدانی دەستکرد و ئامێرەکانی دیکەی تایبەت بە ئاشکراکردنی توشبوانی کۆرۆنا بۆ عێراق لەخۆدەگرێت.
تا ئێستا توشبوانی ڤایرۆسی کۆرۆنا لە عێراقدا گەیشتوەتە 48 کەس و سێ کەسیش گیانیان لەدەستداوە و چوار کەسیش ڤایرۆسەکەیان پەڕاندوە، کە نۆ کەسیان لە هەرێمی کوردستانن هاوکات یەک کەسیش لە شاری سلێمانی گیانی لەدەستداوە.