بەگوێرەی ئامارە رەسمییەكان لەماوەی 24 سەعاتی رابردودا لە ئیتاڵیا، 793
كەس بە ڤایرۆسی كۆرۆنا گیانیان لەدەستداوەو هەروەها لەسەر ئاستی جیهان ژمارەی
توشبون بە ڤایرۆسەكە 300 هەزار كەسی تێپەڕاند.
ئاوێنە: بەگوێرەی ئامارە رەسمییەكان كە لەلایەن دامەزراوەی تەندروستی
ئیتاڵیاوە بڵاوكراوەتەوە بە گیانلەدەستدانی 793 كەس لەماوەی 24 سەعاتی رابردودا، ژمارەی
ئەوانەی لەو وڵاتە بە كۆرۆنا مردون گەیشتۆتە چوار هەزارو 825 كەس.
ژمارەی مردوانی 24 سەعاتی رابردو لە ئیتاڵیا لەسەر ئاستی وڵاتەكەو لەسەر
ئاستی وڵاتانی جیهانیش ژمارەیەكی پێوانەییەو لەسەرەتای بڵاوبونەوەی ڤایرۆسەكەوە
تاوەكو ئێستا بۆ یەكەمجارە لە رۆژێكدا ئەو ژمارەیەی گیانلەدەستدان بە ڤایرۆسەكە لە
وڵاتێكدا تۆماربكرێت.
هەروەها لەماوەی 24 سەعاتی رابردودا شەش هەزارو 500 حاڵەتی نوێی توشبون بە
ڤایرۆسەكە تۆماركراون و بەوەش ژمارەی توشبوان لە ئیتاڵیا گەیشتۆتە 53 هەزارو 500
توشبو.
بەگوێرەی ئامارە رەسمییەكانی وڵاتان ژمارەی توشبوان لەسەرتاسەری جیهاندا
ئەمڕۆ شەممە، 300 هەزاری تێپەڕاندوەو كۆی گشتی توشبوان گەیشتۆتە 303 هەزارو 55 كەس
و هەروەها ژمارەی ئەوانەشی بە ڤایرۆسەكە گیانیان لەدەستداوە لەسەرتاسەری جیهان
نزیكبۆتەوە لە 13 هەزار كەس كە كۆی گشتی مردن بە ڤایرۆسەكە 12 هەزارو 955 كەسە.