وەزارەتی تەندروستی ئێران رایگەیاند: تا ئێستا زیاتر لە 47 هەزارو 500 كەس
لەسەرتاسەری وڵات توشی كۆرۆنا بون و زیاتر لە سێ هەزار كەسیش بەهۆی ڤایرۆسەكەوە
گیانیان لەدەستداوە.
ئاوێنە: كیانوش جەهانپور، وتەبێژی وەزارەتەكە، ئەمڕۆ چوارشەممە، رایگەیاند:
لە نیوەڕۆی دوێنێ سێشەممەوە تاوەكو نیوەڕۆی ئەمڕۆ دو هەزار و 987 حاڵەتی نوێی
توشبون بە كۆرۆنا تۆماركراون و بەوەش كۆی گشتی ژمارەی توشبوان لەسەرتاسەری وڵات
گەیشتۆتە 47 هەزارو 593 توشبو.
كیانوش جەهانپور ئەوەشی خستەڕو كە لەماوەی 24 سەعاتی رابردودا، 138 توشبوی
كۆرۆنا گیانیان لەدەستداوەو كۆی گشتی ژمارەی ئەوانەی بە ڤایرۆسی كۆرۆنا گیانیان
لەدەستداوە لە ئێران گەیشتۆتە سێ هەزارو 36 كەس.
هەروەها وتیشی: تا ئێستا 15 هەزارو 473 توشبوی كۆرۆنا چاكبونەتەوەو
نەخۆشخانەیان جێهێشتوە.
بەقسەی وتەبێژی وەزارەتی دەرەوەی ئێران لە كۆی توشبوان، سێ هەزارو 871
كەسیان دۆخی تەندروستیان ناجێگیرە.