10 بڕیاری نوێ لە لیژنەی باڵای ئۆپەراسیۆنەكانی پارێزگای سلێمانییەوە
  2020-04-02       314       

لیژنەی باڵای ئۆپەراسیۆنەكانی پارێزگای سلێمانی بۆ بەرەنگاربونەوەی كۆرۆنا 10 بڕیاری نوێی دەركردو دەشڵیت: هاوڵاتیان لەناو سنوری قەزای سلێمانیدا، بۆ كاری زۆر پێویست دەتوانن لە سەعات 12ی شەو تا سەعات 6ی بەیانی بێ وەرگرتنی مۆڵەتی رەسمی هاتوچۆ بكەن.

ئاوێنە: د.هەڤاڵ ئەبوبەكر، پارێزگاری سلێمانی لە گشتاندانێكدا كە ئاڕاستەی هەمو یەکە کارگێڕیی و فەرمانگە پەیوەندیدارەکانی سنوری پارێزگاكەی كردوە، 10 بڕیاری نوێی لیژنەی باڵای ئۆپراسیۆنەكانی پارێزگای سلێمانی بۆ روبەڕوبونەوەی كۆرۆنا خستۆتەڕو كە بڕیارەكان ئەمڕۆ پێنجشممە دراون.

بەگوێرەی گشتاندنەكە بڕیارەكان پێكدێن لە:

١. هاوڵاتیان لەناو سنوری قەزای مەڵبەندی سلێمانیدا، بۆ كاری زۆر پێویست، بەپێی ڕێنماییە تەندروستی‌و كارگێڕی‌و ئارامیەكان، دەتوانن لە سەعات (١٢)ی شەو تا سەعات (٦)ی بەیانی بێ‌ وەرگرتنی مۆڵەتی فەرمیی هاتوچۆ‌ بكەن.

٢. پێویستە هاوڵاتیان پابەندی تەواوی ڕێنمایی‌و ڕێكارە تەندروستیی‌و كارگێڕیی‌و ئارامییەكان بن، تەنها لەكاتی دابینكردنی پێداویستی ڕۆژانەو حاڵەتی نەخۆشیدا، بە پێ‌ و، بێ‌ مۆڵبون و كۆبونەوە، كارەكانی خۆیان بەخێرایی جێبەجێ‌ بكەن‌و بگەڕێنەوە ماڵەكانیان.

٣. جگە لەو كەرتانەی لە بەیانەكانی وەزارەتی ناوخۆو لیژنەی باڵای ئۆپراسیۆنەكانی پارێزگای سلێمانی بۆ بەرەنگاربونەوەی كۆرۆنا، رێگەیان پێدراوە هاتوچۆ بكەن، هیچ مۆڵەتپێدانێك لەكاتی دەرچونی ئەم بڕیارانەوە كاری پێ ناكرێت‌و لایەنی مۆڵەتدەرو مۆڵەتپێدراو بەرپرسیار دەبن.

٤. هەركەسێك لەكاتی ئەركی فەرمیدا نەبێت‌و شوێنی كارەكەی‌و پێگەكەی بۆ هاتوچۆكردن بەكاربهێنێت، بەپێی بڕگەكانی بەیانی ژمارە (٢٣)ی ساڵی (٢٠٢٠)ی وەزارەتی ناوخۆ سزادەدرێت.

٥. هەر شوێنێك كە ڕێگای پێدراوە خزمەتگوزاریی گشتیی جێبەجێ‌ بكات ئەگەر پابەندی تەواوی ڕێكارە تەندروستی‌و كارگێڕیی‌و ئارامییەكان نەبێت دادەخرێت.

٦. بانكە ئەهلییەكان تەنها ڕۆژانی دوشەممەو چوارشەممان لە هەفتەیەكدا، لە سەعات (٩)ی بەیانی بۆ (١٢)ی نیوەڕۆ كراوە دەبن، بەپێی ڕێكارە تەندروستی‌و كارگێڕی‌و ئارامییەكان، کە پێشتر ڕاگەیەندراون.

٧. كۆمپانیاكانی دابەشكردنی خۆراك‌و پێداویستیە سەرەكییەكان لەناو شاری سلێمانیدا لە ڕۆژی (٣/ ٤/ ٢٠٢٠)ەوە تەنها لە سەعات (٨)ی بەیانی بۆ (١)ی نیوەڕۆ كارەكانیان جێبەجێ‌ دەكەن.

٨. چالاكیی فرۆشتن و جموجوڵی فرۆشتنی كارگە پیشەسازییەكان، لە سەعات (٧)ی ئێوارە بۆ سەعات (٦)ی بەیانی دەبێت.

٩. لە سنوری پارێزگای سلێمانیدا، کردنەوەی نۆرینگە قەدەغەیەو هەر دەرمانخانەیەکیش دەرچوی کۆلێژی دەرمانسازیی مۆڵەتپێدراو بەڕێوەی نەبات، دادەخرێت.

١٠. پێویستە هەمو ئەو كەس‌و دەستەو لایەن‌و ڕێكخراو كۆمپانیایانەی كاری خێرخوازیی دەكەن، هەماهەنگیی تەواو لەگەڵ یەكە كارگێڕییەكان و بەڕێوەبەرایەتی گشتی چاودێری و گەشەپێدانی كۆمەڵایەتی سلێمانیدا ‌بکەن، لیستی تایبەت بەو خێزانە بەڕێزانەی سودمەند دەبن ئامادە بكەن.

 


زۆرترین بینراو
© 2020 Awene Online, Inc. All Rights Reserved.
×