قائیمقامیەتی سلێمانی، ئەمڕۆ پێنجشەممە، ئاشكرایكرد: لەمانگی ئازاردا لیژنەهاوبەشەكان زیاتر لە شەش هەزار شوێنیان بەسەركردوەتەوەو لە ئەنجامی گەڕان و پشكنینەكان بەهۆی سەرپێچیەوە 345 شوێن داخراون و زیاتر لە 600 شوێنیش روبەڕوی سزای یاسایی كراونەتەوە.

ئاوێنە: لیژنەهاوبەشەكانی قائیمقامیەتی سلێمانی  لە راگەیەندراوێكدا، ئاماری مانگی ئازاری بڵاوكردەوەو بەگوێرەی ئامارەكە لەو مانگەدا لیژنەكان سەردانی شەش هەزار و 379 شوێنیان كردوەو بەوردی لە چۆنیەتی پابەندبون و جێبەجێ كردنی مەرج و رێنماییە تەندروستییەكانیان كۆڵیوەتەوە.

ئەوەشی خستۆتەڕو كە لە ئەنجامی گەڕان و پشكنینەكان بەھۆی پابەندنەبون بە مەرج و رێنماییەكان 637 شوێن پسوڵەی سەرپێچیان بۆ كراوەو 424 شوێنیش ئاگاداركراونەتەوە كە پابەندی مەرج و رێنماییەكان بن.

هەروەها وتوشیەتی"بەھۆی جۆرەكانی سەرپێچییەكانەوە 345 شوێن داخراون و لەبەرامبەر سەرپێچیەكانیان سزادراون و دو  شوێنیش روبەڕوی دادگا كراونەتەوە."

لە ئامارەكەی لیژنەهاوبەشەكانی قائیمقامیەتی سلێمانیدا هاتوە، لە مانگی ئازاردا بڕی  68 تۆن و پێنج سەد كیلۆگرام موادو خۆراكی ماوەبەسەرچو و زیان بەخش لە ناوبراوە.

بە پێی رێنماییەكانی لیژنە ھاوبەشەكان ھەرشوێنێك پابەند نەبێت، سەرەتا ئاگادار دەكرێتەوە، دواتر سزای ماددی دەدرێن و لە ئەگەری دوبارەكردنەوەی سەرپێچیەكاندا روبەڕوی داخستن یان دادگا دەكرێنەوە.