شێوازی دابەشكردنی موچەی كەمئەندامان لەهەولێر ئاشكراكرا
  2020-04-03       296       

بەڕێوەبەرایەتی گشتی چاودێری و گەشەپێدانی کۆمەڵایەتی هەولێر، شێوازی دابەشكردنی موچەی كەمئەندامان ئاشكرادەكات كە بڕیارە سبەی شەممەو دوسبەی یەكشەممە، دابەشبكرێت و دەشڵێت: دابەشكردنەكە بەپێی پیتی ئەبجەدی و لەكاتی جیاوازی ئەو دو رۆژەدا دەبێت.

ئاوێنە: بڕیارە رۆژی شەممە و یەکشەممە رێکەوتی 4و 5ی 4ی ٢٠٢٠ موچەی وەزارەتی کار و کاروباری کۆمەڵایەتی و موچەی کەمئەندامان دابەش دەکرێت.

بەڕێوەبەرایەتی گشتی چاودێری و گەشەپێدانی کۆمەڵایەتی هەولێر، لە راگەیەندراوێكدا ئاگاداری توێژی كەمئەندامانی سنورەكەی كردۆتەوە كە لە پێناو بەرژەوەندی فەرمانبەران و توێژی خاوەن پێداویستی تایبەت و پاراستنیان لە ڤایرۆسی کۆرۆنا، بەڕێوەبەرایەتییەكەیان بە هەماهەنگی لەگەڵ پارێزگای هەولێر و بەڕێوەبەرایەتی گشتی بانکە بازرگانییەکان بڕیاری داوە كە هێزەکانی ناوخۆ  ئاسانكاریی بۆ هاتوچۆی فەرمانبەران و کەمئەندامان بكەن بۆ وەرگرتنی موچەکانیان.

ئەوەشی خستۆتەڕو كە دابەشكردنی دابەشکردنی موچەی کەمئەندامان بە پێی پیتی ئەبجەدی و لە کاتە جیاوازەكانی ئەو دو رۆژەدا دەبێت.

بەگوێرەی راگەیەندراوەكە دابەشكردنی موچەی كەمئەندامان لەو دو رۆژەدا لە سەعات 8ی بەیانی بۆ 1ی پاشنیوەڕۆ دەبێت و هەر سەعاتێكی ئەو ماوەیەش بۆ چەند پیتێكی سەرەتای ناوی كەمئەندامان دیاریكراوە كە بەگوێرەی ریزبەندی پیتە ئەبجەدییەكان رێكخراوە، بەمشێوەیە:

رۆژی شەممە ٤-٤-۲۰۲۰
- کاتژمێر ٨ تاکو کاتژمێر ۹: پیتی (ئەلف)
- کاتژمێر ۹ تاکو کاتژمێر ۱۰: پیتی (ب، پ، ت، ث)
- کاتژمێر ۱۰ تاکو کاتژمێر ۱۱: پیتی (خ، ح، چ، ج‌، د، ذ)
- کاتژمێر ۱۱ تاکو کاتژمێر ۱۲: پیتی (ر، ز، ژ)
- کاتژمێر ۱۲ تاکو کاتژمێر ۱: پیتی (س، ش، ص، ض، ظ)

رۆژی یەکشەممە ٥-٤-۲۰۲۰
- کاتژمێر ٨ تاکو کاتژمێر ۹: پیتی (ط، ع، غ، ف)
- کاتژمێر ۹ تاکو کاتژمێر ۱۰: پیتی (ق، ك، گ، ل)
-کاتژمێر ۱۰ تاکو کاتژمێر ۱۱: پیتی (م)
- کاتژمێر ۱۱ تاکو کاتژمێر ۱۲: پیتی (ن، هـ)
- کاتژمێر ۱۲ تاکو کاتژمێر ۱: پیتی (و، ی)

بەگوێرەی راگەیەندراوەكە بڕیار دراوە بانكەكان ئاسانكاری بۆ پێدانی موچەی كەمئەندامان بكەن بەشێوەیەك كە ئەگەر کەمئەندام خۆیشی ئامادە نەبو،  بریکارەکەی یان خزمی پلە یەکی بتوانێت موچەکەی وەربگرێت بە مەرجێک ناسنامەی کەمئەندامەکەی پێ بێت.

هەروەها لە راگەیەندراوەكەدا هاتوە: لە کاتی پێویستدا نوسینگەی بانکەکان دەتوانن باڵەخانەکانی سەر بە بەڕێوەبەرایەتی گشتیمان بە کار بێنن بۆ دروستنەبونی قەرەباڵەغی.

ئاماژەی بەوەشداوە كە دانیشتوانی ئەو شوێنانەی کەرەنتینە کراون بە تایبەت (سێبیران)، بە پەیوەندیکردن بە ژمارە موبایلی ٤٤٨۲۷٥۰ موچەکانیان بۆ دەبردرێتە ماڵەکانیان و پێویست ناکات خۆیان سەردانی بانکەکان بکەن.

لە بەشێكی دیكەی راگەیەندراوەكەدا داوا لە فەرمانبەران و کەمئەندامان كراوە پابەندی رێنماییەکانی تەندروستی بن و لە کاتی سەردانیان بۆ فەرمانگە و  بانکەکان دەستکێشیان لە دەست بێت، کەمامە ببەستن و دوربن لەبەریەککەوتن لەگەڵ کەسانی تر.


زۆرترین بینراو
© 2020 Awene Online, Inc. All Rights Reserved.
×