وەزارەتی تەندروستی عێراق رایگەیاند: لەماوەی 24 سەعاتی رابردودا 58 حاڵەتی دیكەی توشبون بە كۆرۆنا تۆماركراون و دو كەسیش بەهۆی ڤایرۆسەكەوە گیانیان لەدەستداوە.

ئاوێنە: وەزارەتی تەندروستی عێراق، ئێوارەی ئەمڕۆ شەممە، لە بەیاننامەیەكدا رایگەیاند: لە ماوەی 24 سەعاتی رابردودا لە تاقیگەكانی سەربە وەزارەتەكەیان 58 حاڵەتی نوێی توشبون بە كۆرۆنا تۆماركراون.

بەگوێرەی بەیاننامەكە حاڵەتەكان بەمشێوەیە بەسەر پارێزگاكاندا دابەشبون: 3 حاڵەت لە بەغدا، 9 حاڵەت لە بەسرە، 34 حاڵەت لە نەجەف، 4 حاڵەت لە سلێمانی، 6 حاڵەت لە هەولێر، 1 حاڵەت لە دیالە، 1 حاڵەت لە موسەننا.

هەروەها ئاشكراشیكردوە كە لەو ماوەیەدا دو حاڵەتی گیانلەدەستدان بە ڤایرۆسەكە تۆماركراون كە یەكێكیان لە بەسرەو ئەویدیكەیان لە بەغدا بوە.

هەر بەپێی بەیاننامەكە 33 حاڵەتی توشبوش بەتەواوەتی چاكبونەتەوە كە بەمجۆرە بەسەر پارێزگاكاندا دابەشبون: 4 حاڵەت لە نەجەف، 2 حاڵەت لە بەغدا، 12 حاڵەت لە بەسرە، 6 حاڵەت لە هەولێر، 6 حاڵەت لە دهۆك، 1 حاڵەت لە نەینەوا، 2 حاڵەت لە واست.

هەروەها بەیاننامەكە ئاشكراشیكردوە كە كۆی گشتی توشبوانی ڤایرۆسەكە تا ئێستا لە عێراق گەیشتۆتە 878 حاڵەت و كۆی گشتی ئەوانەشی بە ڤایرۆسەكە گیانیان لەدەستداوە گەیشتۆتە 56 حاڵەت و 259 توشبوش بەتەواوەتی چاكبونەتەوە.