2020-04-05   424     
هاوسەرۆکی ئەنجومەنی جێبەجێکاری سووریای دیموکرات ئاماژە بە پابەند نەبوونی تورکیا بە ڕێککەوتنی ئاگربڕ دەکات و داوا لە کۆمەڵگای نێودەوڵەتی دەکات گوشار بخاتە سەر تورکیا.
ئاوێنه: ئیلهام ئەحمەد، هاوسەرۆکی ئەنجومەنی جێبەجێکاری سووریای دیموکرات بەئاماژەدان بە پابەند نەبوونی تورکیا و گروپە سووریە چەکدارەکانی سەر بەو وڵاتە لە باکووری سووریە بە ڕێککەوتنی ئاگربەست ڕایگەیاند: سوپای تورکیا پەیامەکەی نەتەوەیەکگرتووەکان لەبارەی ئاگربەست لەبەرچا ناگرێت و درێژە بە هێرشە داگیرکارانەکانی دەدات بۆ سەر رۆژئاوای كوردستان بۆ ڕەچاوکردنی ئاگربەست دەبێت کۆمەڵگای نێودەوڵەتی گوشار بخاتە سەر تورکیا.
ئاوێنه: ئیلهام ئەحمەد دەڵێت: پەیامی ئاگربەس لەلایەن نەتەوە یەکگرتووەکانەوە زۆر گرینگە. بەڵام ئاگربەس بەبێ چارەسەر کردنی کێشەکان درگایێکی دیکە بۆ شەڕ دەکاتەوە.
هاوسەرۆکی ئەنجومەنی جێبەجێکاری سووریای دیموکرات وتیشی: هێرشەکانی ئەرتەشی تورکیا لەکاتێکدا کە هەمووان بۆ خۆدوورگرتن لە کۆرۆنا دەبێت لە ماڵەکانیان بمێننەوە بەڵام هێرشەکان ناچار بە ئاوار بوونیان دەکات.
ناوبراو لە کۆتاییدا ڕایگەیاند: کۆمەڵگای نێودەوڵەتی دەبێت هەڵویستێکی جیدی هەمبەر تورکیا بگرێتە بەر چوونکە تورکیا و گرووپە چەکدارەکانی سەربەو وڵاتە هۆکاری گرێ کوێرەی قەیرانی سووریان.