وەزارەتی دارایی و ئابوری حكومەتی هەرێمی كوردستان شەش بڕیاری نوێی دەركرد،
لەوانە كاراكردنی سندوقی خانەنشینی لە هەرێمی كوردستان و راسپاردنی بەڕێوەبەرایەتی گشتی خانەنشینی بۆ
ئامادەکردنی پەیکەری نوێی بەڕێوەبەرایەتییەكە کە دەبێتە تاکە بەڕێوەبەرایەتی گشتی
خانەنشینان لەهەرێمی كوردستان كە گشت خانەنشینانی شارستانی و سەربازی لەخۆدەگرێت.
ئاوێنە: وەزارەتی دارایی و ئابوری حكومەتی
هەرێمی كوردستان لە راگەیەندراوێكدا ئاشكرایكرد: ئەمڕۆ پێنجشەممە ڕێکەوتی (٩/٤/٢٠٢٠) بە
ئامادەبونی سەرجەم ئەندامەکانی، ئەنجومەنی وەزارەتی دارایی و ئابوری بەسەرپەرشتى
ئاوات شێخ جەناب، وەزیری دارایی و ئابوری حکومەتی هەرێمی کوردستان، کۆبونەوەی ژمارە
(٤)ی ئاسایی خۆی بە شێوازی ئۆنلاین ئەنجامدا.
بەگوێرەی راگەیەندراوەكە، لەژێر رۆشنایی راسپاردەکانی لیژنەی باڵای
جێبەجێکردنی یاسای چاکسازی، وەزیری دارایی و ئابوری بڕیاریدا لەسەر:
١- کاراکردنی سندوقی خانەنشینی لەهەرێمی
کوردستان و کردنەوەی ئەژمێرەیەکی تایبەتی بانکی بۆ ئەو سندوقە.
٢- بەڕێوەبەرایەتی گشتی خانەنشینی راسپێردرا
لەسەر ئامادەکردنی پەیکەری نوێی بەڕێوەبەرایەتی گشتی خانەنشین، کە دەبێتە تاکە بەڕێوەبەرایەتی گشتی خانەنشینان
لەهەرێمدا، بەشێوەیەک گشت خانەنشینانی (شارستانی، سەربازی، هێزەکانی ئاسایش و پۆلیسی
ناوخۆ، یەکە رێکنەخراوەکانی هێزەکانی پێشمەرگە) لەخۆدەگرێت.
٣- بەڕێوەبەرایەتی گشتی ژمێرکاری راسپارد
بۆ هەماهەنگی لەگەڵ وەزارەتی پیشمەرگە، بۆ ئەوەی هەنگاوی پێویست بگرنە بەر بەمەبەستی
یەکخستن و رێکخستنی یەکەکانی ژمێریاری هێزەکانی پێشمەرگەی کوردستان.
٤- بڕیاردرا لەسەر پەیڕەوکردنی میکانیزمێکی
گونجاو بۆ لابردنی ئاستەنگەکانی بەردەم کردنەوەی ئەژمێرەیەکی کەسی بۆ سەرجەم موچەخۆران.
٥- ئامادەکردنی رێکارە یاسایی و کارگێرییەکان،
بۆ وەرگرتنەوەی قەرزە بازرگانییەکان.
٦- بڕیاردرا لەسەر هەماهەنگی تەواو لەنێوان
لیژنەی باڵای وەزارەتی دارایی و ئابوری تایبەت بە جێبەجێکردنی یاسای چاکسازی لەگەڵ
سەرجەم وەزارەتە پەیوەندیدارەکان لە پێناو جێبەجێکردنی خێرای یاساکەدا.