ئەندامی جڤاتی نیشتمانی بزوتنەوەی گۆران، كاروان هاشم پشكەكانی گۆران لەكابینەی نوێی حكومەت ئاشكرا دەكات راشیدەگەیەنێت لە پێش رێککەوتنیان لەگەڵ پارتی دیموکراتی کوردستان، داوایان لە یەکێتیی نیشتمانیی کوردستان کردووە وەک نیەت پاکییەک یەکێک لەو چوار رێککەوتنە جێبەجێ بکەن کە لە رابردودا واژویان کردوە بەڵام ئەم پڕۆسەیە ئەنجام نەدراوە.
ئاوێنە: ئەندامی جڤاتی نیشتمانی بزوتنەوەی گۆران، كاروان هاشم بە ئاژانسی ئەنادۆڵی راگەیاندوە پشكەكانی گۆران لەحكومەت بریتین لە جێگری سەرۆكی هەرێم، یاریدەدەری سەرۆك وەزیران بۆ كاروباری چاكسازی‌و وەزارەتی دارایی‌و ئابوری، ئاوه‌دانكردنه‌وه، بازرگانی، كار و كاروباری كۆمه‌ڵایه‌تی، بریكاره‌كانی وه‌زاره‌تی په‌روه‌رده، كاره‌با، شاره‌وانی و ناوخۆ، ئه‌مینداری گشتی وه‌زاره‌تی پێشمه‌رگه، ئه‌ندامێكی ئه‌نجومه‌نی ئاسایش، هه‌روه‌ها 12% له كۆی به‌ڕێوه‌به‌ره گشتییه‌كان و راوێژكاره‌كان له سه‌رۆكایه‌تییه‌كاندا.
وتیشی "ئێمە لە دوایین کۆبوونەوەمان لەگەڵ پارتی کە واژووکردنی رێکەوتننامەکە بوو، گەیشتینە رێککەوتن لەسەر بەرنامەی سیاسیی کابینەی داهاتوو، پشکەکانی بزووتنەوەی گۆڕان، دانیشتنی پەرلەمان و هەموارکردنەوە یاسای سەرۆکایەتی هەرێم لە ناو پەرلەمان و دواتر راسپاردنی سەرۆکوەزیران".