پۆلیسی هۆڵه‌ندا: ئه‌نجامده‌ری هێرشه‌كه‌ی ئه‌مڕۆی "ئۆترێخت" له‌دایكبوی توركیایه‌
  2019-03-18       1244       
بڵاوبونه‌وه‌ی پۆلیس له‌شوێنی روداوه‌كه‌

پۆلیسی هۆڵه‌ندا وێنه‌ی پیاوێكی 37 ساڵانی بڵاوكرده‌وه‌ كه‌ له‌دایكبوی توركیایه‌و گومان ده‌كه‌ن ئه‌نجامده‌ری هێرشه‌كه‌ی  ئه‌مڕۆ دوشه‌ممه‌ی شاری ئۆترێخت بێت كه‌ تێیدا كه‌سێك كوژراو  ژماره‌یه‌كی دیكه‌ش برینداربون.

ئاوێنه‌: سه‌رله‌به‌یانی ئه‌مڕۆ دوشه‌ممه‌ له‌ یه‌كێك له‌ شه‌مه‌نده‌فه‌ره‌كانی شاری ئۆترێخت-ی هۆڵه‌ندا كه‌سێك ته‌قه‌ی كردو به‌پێی لێدوانی به‌رپرسانی پۆلیس له‌ئه‌نجامی ته‌قه‌كردنه‌كه‌دا هاوڵاتییه‌ك كوژراوه‌و ژماره‌یه‌كی دیكه‌ش برینداربون.

هێزه‌ ئه‌منییه‌كانی شاره‌كه‌ دوای روداوه‌كه‌ رێوشوێنه‌ ئه‌منییه‌كانیان له‌ قوتابخانه‌و مزگه‌وت و وێستگه‌كانی گواستنه‌وه‌ توندوتۆڵ كرده‌وه‌ و رایانگه‌یاند كه‌ ئه‌نجامده‌ری هێرشه‌كه‌ هێشتا ده‌ستگیرنه‌كراوه‌.

پۆلیسی ئۆترێخت له‌هه‌ژماری ره‌سمی خۆی له‌تویته‌ر له‌گه‌ڵ بڵاوكردنه‌وه‌ی وێنه‌ی ئه‌نجامده‌ری گومانلێكراوی هێرشه‌كه‌دا رایگه‌یاندوه‌ كه‌ له‌په‌یوه‌ست به‌ روداوی ته‌قه‌كردنه‌كه‌وه‌ به‌دوای ئه‌و كه‌سه‌دا ده‌گه‌ڕێن‌ كه‌ ‌ناوی "گۆكمان تانیس"، ته‌مه‌نی 37 ساڵه‌و له‌دایكبوی توركیایه‌.

پۆلیسی ئۆترێخت داوای له‌هاوڵاتیان كردوه‌ كه‌ ئه‌گه‌ر بینیان خۆیان لێی نزیك نه‌كه‌ونه‌وه‌و ده‌ستبه‌جێ په‌یوه‌ندی به‌ پۆلیسه‌وه‌ بكه‌ن.

 

 

زۆرترین بینراو
© 2024 Awene Online, Inc. All Rights Reserved.
×