لاهور شێخ جه‌نگی: یه‌كێتی هه‌وڵی چڕی هه‌یه‌ بۆ ئاساییكردنه‌وه‌ی دۆخی كه‌ركوك
  2019-03-20       2350       

لاهور شێخ جەنگی، بەرپرسی ئاژانسی پاراستن و زانیاریی/زانیاری هەرێم رایگه‌یاند، حزبه‌كه‌ی هه‌وڵی چڕی هه‌یه‌ بۆ هه‌رچی زوه‌ ئاساییكردنه‌وه‌ی دۆخی كه‌ركوك و ناوچه‌ كێشه‌له‌سه‌ره‌كان و پێداگریش له‌وه‌ ده‌كات كه‌ كابینه‌ی نوێی حكومه‌تی هه‌رێم، كابینه‌ری شه‌راكه‌تی راسته‌قینه‌ بێت.

ئاوێنه‌: لاهور شێخ جه‌نگی، ئه‌مڕۆ چوارشه‌ممه‌ له‌په‌یامێكی پیرۆزباییدا به‌بۆنه‌ی جه‌ژنی نه‌ورۆزه‌وه‌ رایگه‌یاند"نه‌رۆزی ئه‌مساڵ، نه‌ورۆزی سه‌ركه‌وتنه‌كانه‌‌. به‌ پشتیوانیی یه‌كێتیی نیشتمانیی كوردستان له‌ رۆژئاوای كوردستان، تیرۆریستان و دوژمنانی گه‌ل و دنیا,  تێكشاون، و له‌ كوردستانی باشوریش، داگیركه‌ران هێزی داگیركاری و جورئه‌تی قڕكردنیان نه‌ماوه‌و ئه‌فسانه‌ی سه‌ركه‌وتنی شه‌ڕڤان و پێشمه‌رگه‌، پشتیوانیی زیاتری نێوده‌وڵه‌تیی بۆ پاراستنی ئه‌زمونی كوردستان، مسۆگه‌ر كردوه‌."

وتوشیه‌تی"به‌ هه‌مان گوڕ و تینی خه‌بات و به‌رگرییه‌وه‌، یه‌كێتیی نیشتمانیی پێداگره‌ له‌ پاراستنی ئاسایش و ناسنامه‌ی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم، و به‌پشتبه‌ستن به‌ ده‌ستورو یاسا و سودوه‌رگرتن له‌ هه‌مو توانا و رێكاره‌ گشتی و تایبه‌ت و جه‌ماوه‌رییه‌كان، هه‌وڵی چڕی هه‌یه‌ بۆهه‌رچی زوه‌ ئاسایی كردنه‌وه‌ی دۆخی كه‌ركوك و ناوچه‌ كێشه‌له‌سه‌ره‌كان، گه‌شه‌پێدان و پاراستنیان."

سه‌باره‌ت به‌ ناوخۆی هه‌رێمی كوردستانیش، لاهور شێخ جه‌نگی ئه‌وه‌ی خستۆته‌ڕو كه‌ "یه‌كێتیی نیشتمانیی پێداگره‌ له‌ زه‌مانه‌تكردنی تێپه‌ڕاندنی قه‌یرانه‌ ئابوری و سیاسییه‌كان و پێداگره‌ له‌وه‌ی كابینه‌ی نوێی حكومه‌تی هه‌رێم، كابینه‌ی شه‌راكه‌تی راسته‌قینه‌و خزمه‌تگوزای یه‌كسانی هه‌مو خه‌ڵك بێت و له‌ پێناو دابینكردن و پارێزگاریكردن له‌ ژیانێكی ئاسوده‌ی پڕ ده‌سكه‌وت بۆ كۆمه‌ڵانی خه‌ڵكی كوردستان خه‌بات بكات."

له‌كۆتاییشدا سه‌باره‌ت به‌ ناوخۆی یه‌كێتیش وتویه‌تی"له‌م نه‌ورۆزی نه‌پساوه‌یی و تێكۆشان و كوردبونه‌دا، ئامانجی گه‌وره‌مان وایه‌ كه‌ به‌هاری ئه‌مساڵ، به‌هاری نوێبونه‌وه‌ی یه‌كێتیی و سه‌ره‌تای كۆتایی بێت بۆ قۆناغه‌ سه‌خت و تاڵه‌كانی رابردو."


زۆرترین بینراو
© 2024 Awene Online, Inc. All Rights Reserved.
×