ئەنجومەنی پارێزگای نەینەوا، ئەمڕۆ هەینی چەند بڕیارێكی لەپەیوەست بە
روداوی ژێرئاوكەوتنی بەلەمی دورگە گەشتیارییەكەی موسڵ دەركرد كە یەك لەوانە هەڵوەشاندنەوەی
مۆڵەتی وەبەرهێنانی دورگەكەو رەوانەكردنی وەبەرهێنەرو بەڕێوەبەرایەتی دورگەكەیە بۆ
بەردەم دادگا. وێڕای لێكۆڵینەوە لەگەڵ ژمارەیەك لەفەرمانگەكانی پارێزگاكە.
ئاوێنە: نورەدین قەبلان، جێگری سەرۆكی ئەنجومەنی پارێزگای نەینەوا
لەبەیاننامەیەكدا رایگەیاند"ئەنجومەنی پارێزگا ژمارەیەك بڕیارەی لەپەیوەست بە
ژێرئاوكەوتنی بەلەمی دورگە گەشتیارییەكە لە غاباتی موسڵ دەركرد، لەوانە
هەڵوەشاندنەوەی مۆڵەتی وەبەرهێنانی دورگەكە، رەوانەكردنی وەبەرهێن و
بەڕێوەبەرایەتی دورگەكە بۆ بەردەم دادگاو سەپاندنی قورسترین سزاكان بەپێی یاسا،
سەرباری هەژماركردنی قوربانیانی بەلەمەكە بە شەهیدو قەرەبوكردنەوەی رزگاربوان
بەپێی قەبارەی زیانەكان."
بەپێی قسەی نورەدین قەبلان بڕیاریش دراوە لێكۆڵینەوە لەگەڵ سەرجەم لایەنە
كارگێڕی و چاودێرییەكانی پارێزگای موسڵ، دەستەی گەشتوگوزار، سەرچاوەكانی ئاو،
پڕۆژەی بەنداوی موسڵ، هۆبەی پكشنینی ئاویی و فریاكەوتنی روبار لەوەزارەتی
گواستنەوە، دەستەی وەبەرهێنان، شارەوانی موسڵ، خانوبەرەی دەوڵەت، بەڕێوەبەری
بەرگری شارستانی و هەروەها كارمەندانی ئەمنی دورگەكە، بكرێت.
ئاوێنە: دوێنێ پێنجشەممە بەلەمێك لە دورگەیەكی گەشتیاری شاری موسڵ لەروباری
دیجلە ژێرئاوكەوت و بەپێی دواین ئامار لە روداوەكەدا زیاتر لە 100 كەس گیانیان لەدەستداوە.