2020-05-20 556
كۆمەڵێك لە فەرمانبەران و مامۆستایانی هۆشداری بە حكومەتی هەرێم دەدەن لەسەر مووچە و شایستە داراییەكانیان و ڕایدەگەیەنن، كە “تا پێش تاقیكردنەوەكانی كۆتایی ساڵ مووچەیەكی تر وەرنەگرین، ئەوا پابەند نابین بە دەوامەوە و بایكۆتی تاقیكردنەوەكان دەكەن”.
ئاوێنه: كۆمەڵێك لە فەرمانبەران و مامۆستایانی زانكۆی گەرمیان لە بەیاننامەیەكدا ئاماژەیان بەوەكردووە، دژ بە هەموو جۆرە سیاسەتێكی نامرۆیی و ناڕەواین كە بیەوێت مافەكانم زەوت بكات و كەرامەتمان بڕوشێنێت.
ئاماژەشیان بەوەكرد، سبەینێ كاتژمێر 5ی دوانیوەڕۆ، لە كەمپی زانكۆی گەرمیان لە بەردەم بینای كۆلێجی پەروەرده، گردبوونەوەیەكی بەرفراون دەكەین.
دەقی بەیاننامەكە:
بەیاننامەی ناڕەزایی كۆمەڵێك لە مامۆستایان و فەرمانبەرانی زانكۆی گەرمیان
لەبارەی دواكەوتنی مووچە و ئەگەری بایكۆتكردنی تاقیكردنەوەكانی كۆتایی ساڵ
لەگەڵ دەستپێكردنی جوڵانەوەیی ناڕەزایەتی مامۆستایان و فەرمانبەران دژ بە سیاسەتی چەوساندنەوە و برسیكردن كە حكومەتی هەرێم پەنای بۆ بردووە, ئێمەیش وەكو كۆمەڵێك لە مامۆستایان و فەرمانبەرانی زانكۆی گەرمیان لە ڕوانگەی بەرپرسیارێتی ئەخلاقیی و ئایینی و پیشەییمان, بیر و دەنگ و هەڵوێستی خۆمان یەكخستووە و بەشێكی گرنگی خەباتی مەدەنین و لە پێناو پاراستن و پیرۆزڕاگرتنی بەها و پڕەنسیپەكانی ژیانمان تێدەكۆشین و دەمانەوێت ئیرادە و شكۆ و سەربەخۆیی بۆ ئەو دەزگایەی كە تێیدا كاردەكەین, بگەڕێنینەوە, دووپاتی دەكەینەوە دژ بە هەموو جۆرە سیاسەتێكی نامرۆیی و ناڕەواین كە بیەوێت مافەكانم زەوت بكات و كەرامەتمان بڕوشێنێت. وەك كۆمەڵێك مامۆستا و هاوپیشە لەم رێگە سەخت و دژواردەدا ئامادەی هەرجۆرە قوربانیدانێكین و زەڕەیەك دەستبەرداری خواستەكانمان نابین و هەموو هەوڵێكی شەرمنانە و ترسنۆكانە و هەڕەشەئامێز بۆ پاشەكردن و دەستلێهەڵگرتن لەم كارە مانادار و پیرۆزە, لای ئێمە هیچ بەهایەكی نییە و سازش لەسەر بیروباوەڕەكانمان ناكەین. لەم ساتە بەدواوە لە هۆڵەكانی خوێندندا لەپاڵ وانەی بابەتی و پسپۆریی, وانەی ئازادی و سەروەری و شكۆمەندی بە خوێندكارەكان دەڵێینەوە و پێیان دەڵێین مرۆڤی هۆشیار و باوەڕمەند و خۆڕاگر نابێت ستەمكاری قبوڵ بكات و چاو لە زوڵ و نادادی ناپۆشێت و بێدەنگی و سەركزی هەڵنابژێرێت, و جگە لە پەروەردگار نابێت بەندەی هیچ كەس و گروپ بێت. لە كۆتاییدا وەك دەنگێكی ڕەخنەگر و بوێر بە ئاشكرا ڕایدەگەیەنین دژ بە سیاسەتی چەوت و نابەرپرسیارانەی حكومەتین لەسەر پرسی مووچە و دەمانەوێت لەسەر بنەمای ماف و ئەرك و لە وادەی خۆیدا, مووچەی شایستەی خۆمان وەربگرین, لەسەر ئەو بنەمایە ئەگەر تا پێش تاقیكردنەوەكانی كۆتایی ساڵ مووچەیەكی تر وەرنەگرین, ئەوا پابەند نابین بە دەوامەوە و بایكۆتی تاقیكردنەوەكان دەكەین.
كۆمەڵێك لە مامۆستایان و فەرمانبەرانی زانكۆی گەرمیان