عەبدوڵا ئەحمەد، جێگری بەرێوەبەری گشتی تەندروستی سلێمانی رایگەیاند: لەگەڵ ئەنجامدانی نوێژی جەژنم و دەشڵێت: مەترسی كۆرۆنا ناگاتە ئەوەی دەرگای مزگەوتەكان بۆ نوێژی جەژن دابخرێن.
ئاوێنە: عەبدوڵا ئەحمەد، ئێوارەی ئەمڕۆ شەممە، لەلاپەڕەی خۆی لە فەیسبوك نوسیویەتی"لەگەڵ ئەنجامدانی نوێژی جەژنم لە مزگەوت بێت یان دەرەوە بەڵام بەپێی ڕێنماییە تەندروستیەکان."
جێگری بەڕێوەبەری گشتی تەندروستی سلێمانی، وتوشیەتی"من وەكو خۆم باوەڕم وایە راستە ڤایرۆسی كۆرۆنا بونی هەیە، بەڵام مەترسیەكەی ناگاتە ئەوەی دەرگای مزگەتەكان بۆ نوێژی جەژن دابخرێن."
ئەوەشی خستۆتەڕو"گەر ئەمڕۆ تەماشای بازاڕو مۆڵ و مزگەوتەكان بكرێت دیارە كە قەرەباڵغیەكەی لە رۆژی جەژن و نوێژی جەژن زۆرترو زیاترە ئیدی بە كام پێوەر دەتوانرێت بوترێت كۆرۆنا تەنها بۆ جەژن و نوێژی جەژن مەترسی هەیە!؟"
جەختیشی كردۆتەوە"هیچ زانستێكی پزیشكی پێمان ناڵێت ئەمڕۆی بازاڕ ئاسایی بێت بەڵام بەیانی نوێژی جەژن مەترسییە بۆ بڵاوبونەوەی ڤایرۆسی كۆرۆنا."
وتوشیەتی"جا تكام وایە لایەنە پەیوەندیدارەكان، وەزارەتی ناوخۆو وەزارەتی تەندروستی و وەزارەتی ئەوقاف و كاروباری ئایینی بەو بڕیارەیاندا بچنەوەو رێگەبدەن خەڵكی مسوڵمان نوێژی جەژن ئەنجام بدەن ئەوكات قەدەغەی هاتوچۆ رابگەیەنن."
هەروەها پێشنیاریشی بۆ موسڵمانان و مامۆستایانی ئایینی كردوە"گەر هاتو دەرگای مزگەوتەكانیان بۆ نوێژی جەژن داخست ئەوا ئەو سوننەتەی نازادارو پێشەوامان "درودی خوای لەسەر بێت" زیندوبكەنەوەو نوێژی جەژن ببەنە دەرەوەی مزگەوتەكان...بەڵام زۆر گرنگە کە ڕێنماییە تەندروستیەکان جێبەجێ بکەین."