2019-03-26 2456
حه‌یده‌ر عه‌بادی، مه‌سعود بارزانی
بارەگای مه‌سعود بارزانی وەڵامی وتەکانی حەیدەر عەبادی، لەبارەی كەركوك‌و روداوه‌كانی 16ی ئۆكتۆبه‌ر ده‌داته‌وه‌و رایده‌گه‌یه‌نێت، "ئەوانەی تەنسیقیان لەگەڵ عەبادی كرد خائین‌و نیشتیمانفرۆشن". ئاماژه بۆ ئه‌وه‌ش ده‌كات، "عەبادی كەسێكی بێوەفا بو بەرانبەر پێشمەرگەو گەلی كوردستان."
ئاوێنه: نوسینگەی ڕاگەیاندنی بارەگای بارزانی له‌راگه‌یه‌ندراوێكدا وه‌لاَمی حه‌یده‌ر عه‌بادی داوه‌ته‌وه‌و له‌به‌شێكیدا هاتووه، "حەیدەر عەبادی هەندێ قەزاوەت‌و قسەی نابەجێی لەبارەی كەركوك‌و پێشمەرگەو گەلی كوردستان خستووتەڕو كە مەبەست لێی تێكدانی ئەو كەشە ئیجابیەیە كە لەدوای هەڵبژاردنەكانی عێراق لەنێوان هەرێم‌و بەغدا هاتووەتە ئاراوەو بۆ مەرامی تاكەكەسی ئەو قسانەی كردووە."
بارزانی راشیگه‌یاندووه، "بەلای گەلی كوردستانیش ئەو لایەنە كوردیانەی عەبادی بەتوندڕەو وەسفی دەكات دڵسۆزو نیشتیمانپەروەرن، ئەوانەی تەنسیقیان لەگەڵ عەبادی كرد ئەوان خائین‌و نیشتیمانفرۆشن. ئەوەی بەلای ئێمەوە گرنگە ڕای گەلی كوردستانەو هەڵسەنگاندنی خەڵكی حاقید هیچ بەهایەكی نییە."
چه‌ند رۆژێك له‌مه‌وبه‌ر حه‌یده‌ر عه‌بادی سه‌رۆكوه‌زیرانی پێشوی عێراق باسی له‌روداوه‌كانی 16ی ئۆكتۆبه‌ری 2017 كردو ره‌تیكرده‌وه هیچ رێككه‌وتنێك هه‌بوبێت بۆ كشانه‌وه‌ی پێشمه‌رگه له‌كه‌ركوك، له‌هه‌مانكاتدا ئاماژه‌ی بۆ ئه‌وه كرد كه به‌شێك له‌پێشمه‌رگه‌كانی یه‌كێتی ئاماده‌نه‌بون له‌دژی هێزه عێراقییه‌كان شه‌ڕ بكه‌ن.
دەقی ڕاگەیاندراوەکەی بارەگای بارزانی:
وەڵامێك بۆ وتەكانی عەبادی
حەیدەر عەبادی سەرۆكی یەكێك لە كوتلەكانی ناو ئەنجوومەنی نوێنەرانی عێراق لە چاوپێكەوتنێكیدا لەگەڵ تەلەفزیۆنی دیجلە كە ڕۆژی شەممە 23ـی 3ـی 2019 بڵاوكراوەتەوە، بەداخەوە هەندێ قەزاوەت و قسەی نابەجێی لەبارەی كەركووك و پێشمەرگە و گەلی كوردستان خستووتەڕوو كە مەبەست لێی تێكدانی ئەو كەشە ئیجابیەیە كە لەدوای هەڵبژاردنەكانی عێراق لەنێوان هەرێم و بەغدا هاتووەتە ئاراوە و بۆ مەرامی تاكەكەسی ئەو قسانەی كردووە.
بۆ هەموو لایەك ڕوونە كە پێكهاتەكانی عێراق لە هەڵبژاردنەكاندا عەبادی و هەموو ئەوانەی تریان سزا دا كە بەنیازی شەڕی ناوخۆ و تێكدانی پێكەوەژیان بوون و لە بەرانبەر گەلی كوردستان حاقد بوون و پێشێلكاریی دەستووری و تاوانیان لە كەركووك و دوز ئەنجام دا و لە هەمانكاتدا گەلی كوردستانیش لە هەڵبژاردنی پارلەمانی كوردستاندا پاداشی پێشمەرگە و بەرگریكارانی كوردستانیان دایەوە.
عەبادی كەسێكی بێ وەفا بوو بەرانبەر پێشمەرگە و گەلی كوردستان. ئەگەر پێشمەرگە نەبا كەسێكی وەك ئەو هەرگیز چاوی بە موسڵ نەدەكەوت بۆ ئەوەی بتوانێ سەركەوتن بەسەر داعش لە موسڵ بۆ خۆی بدزێت و خۆی پێ هەڵكێشێ.
بەلای گەلی كوردستانیش ئەو لایەنە كوردیانەی عەبادی بە توندڕەو وەسفی دەكات دڵسۆز و نیشتیمانپەروەرن و، ئەوانەی تەنسیقیان لەگەڵ عەبادی كرد ئەوان خائین و نیشتیمانفرۆشن. ئەوەی بەلای ئێمەوە گرنگە ڕای گەلی كوردستانە و هەڵسەنگاندنی خەڵكی حاقید هیچ بەهایەكی نییە.
هێزی پێشمەرگەی كوردستانیش چۆن خەونی ناحەزان و ڕژێمەكانی پێشووی لەگۆڕ نا ئەوەهایش بە قارەمانێتیی خۆی پیلانە نەگریسەی عەبادی لەگۆڕ نا و خودی عەبادی باشتر لە هەركەس دەزانێ پێشمەرگە چیی بەسەر خۆی و پیلانەكەیدا هێنا.
دەبێ هەموولایەكیش ئەوە باش بزانن ئێستا دۆخێكی تر لە عێراقدا هاتووەتە ئاراوە و دەموچاوی حاقد و خۆپەرست و یاساشكێن نابێ ڕۆڵیان هەبێ. قۆناغی ئێستا قۆناغی بەرپرسیارێتی و پتەوكردنی بنەماكانی پێكەوەژیان و چەسپاندنی شەراكەت و تەوافوق و تەوازونە لە عێراقدا.
نووسینگەی ڕاگەیاندنی بارەگای بارزانی
26ـی 3ـی 2019