2019-03-26 1392
بەشیر حەداد
به‌وته‌ی جێگری سەرۆکی پەرلەمانی عێراق، ناردنی موچەی فەرمانبەرانی هەرێمی کوردستان بەردەوام دەبێت‌و هیچ مەترسییەک لەسەر پشکی هەرێم لەبودجەی عێراقدا نییە.
ئاوێنه: له‌به‌رامبه‌ر لێدوانی چه‌ند په‌رله‌مانتارێكی عێراق سه‌باره‌ت به‌ئه‌گه‌ری بڕینی بودجه‌و موچه‌ی فه‌رمانبه‌رانی هه‌رێم له‌لایه‌ن به‌غداوه، بەشیر حەداد جێگری سەرۆکی پەرلەمانی عێراق لەکۆنگره‌یه‌کی ڕۆژنامەوانیدا رایگه‌یاند، "چۆن لە یاسای بودجەی گشتی عێراق توانیمان موچە لەململانێێ سیاسییەکانی عێراقی دەربێنین دەبێت لەهەرێمی کوردستانیش ئەو دۆخە بەو شێوەیە بێت‌و پرسی موچە لەململانێی سیاسی دەربهێنرێت، نابێت لەئەگەری گرژیی سیاسییدا خەڵک توشی دڵەڕاوکێ بکرێت".
وتیشی، "سێ مانگە بڕە پارەی تەواو لەبەغداوە دێت بۆ هەرێم، دڵنیایی دەدەینە خەڵکی کوردستان وەک وەزیری دارایی عێراقی فیدراڵ-یش ئاماژەی بۆکرد، موچە ئیستیحقاقی دەستورییە بۆ هەمو هاونیشتیمانیانی عێراق‌و چۆن بۆ شارەکانی عێراق دەچێت هەر بەوشێوەیە بۆ هەرێمی کوردستانیش دەنێردرێت".
ناوبراو راشیگه‌یاند،، لەئێستادا سیاسەتی دژایەتیکردنی هەرێم‌و بڕینی موچە لەلایەن بەغداوە کۆتاییهاتووە، ڕادەستنەکردنی نەوتیش نابێتە کێشە لەبەردەم نەناردنی موچەی فەرمانبەراندا، چونکە ئەو بابەتە لەبودجەدا جێگیرکراوە.
پێشتر بڵێسه جه‌بار فه‌رمان، په‌رله‌مانتاری یه‌كێتی له‌په‌رله‌مانی عێراق هۆشداریدا له‌باره‌ی ئه‌گه‌ری راگرتنی ناردنی موچه‌ی فه‌رمانبه‌ران له‌لایه‌ن به‌غداوه‌و وتی، "ماوەی سێ مانگە حکومەتی عێراق موچەو بودجەی هەرێمی کوردستان دەنێرێت بێئەوەی لەبەرانبەردا یەک تەنەکە نەوت ڕادەستی سۆمۆ کرابێت."