پەرلەمانی توركیا پارێزبەندی لە دو پەرلەمانتاری كوردو پەرلەمانتارێكی
جەهەپە وەرگرتەوە. پاش ئەوەش یەكێك لە پەرلەمانتارە كوردەكان دەستگیركرا.
ئاوێنە: بەپێی هەواڵێكی ئاژانسی میزۆپۆتامیا، ئەمڕۆ پێنجشەممە، پەرلەمانی
توركیا، پارێزبەندی لە هەریەكە لە لەیلا گوڤەن، سەرۆكی كۆنگرەی جڤاكی دیموكرات(كەجەدە)و
پەرلەمانتاری جولەمێرگی هەدەپە، موسا فاریسۆڵار، پەرلەمانتاری ئامەدی هەدەپەو
ئەنیس بەربەرئۆغلۆ، پەرلەمانتاری پارتی گەلی كۆماری(جەهەپە) كە ئۆپۆسیۆنی سەرەكی
وڵاتە، وەرگرتەوە.
لابردنی پارێزبەندی پەرلەمانتاران بە بیانوی ئەوەیە، گوایە ئەو تۆمەتانەی لەسەریان
بوە پشتڕاستکراوەتەوە.
لەدوای خوێندنەوەی بڕیارەكە لە پەرلەمانی توركیا، لەیلا گوڤەن وەك
ناڕەزایەتییەك بەرامبەر بەو بڕیارە، بە كوردی وتی"بەرخۆدان ژیانە."
هەر بەگوێرەی ئەو ئاژانسە موسا فارسیۆگوڵار، پەرلەمانتاری ئامەدی هەدەپە،
كە ئەمڕۆ پارێزبەندی لێوەرگیرایەوە، لە ئامەد دەستگیركرا.
ئەو پەرلەمانتارەی هەدەپە لە بازگەیەك لەسەر رێی ئامادە-رحا دەستگیركراوە
كاتێك بەرەو ئەنكەرە چوە.