مامۆستایانی ئایینی پێنجوێن بڕیاریاندا دەرگای مزگەوتەكان دابخەن و قائیمقامی پێنجوێن-یش دەڵێت، بڕیارەكە لە پێناو پاراستنی تەندروستی هاوڵاتیاندایە.
ئاوێنە: زانا رەحمان رەحیم، قائیمقامی پێنجوێن بە ماڵپەڕی رەسمی یەكێتی راگەیاند: ئەمڕۆ هەینی 5-6-2020، لە پێناو پاراستنی تەندروستی هاوڵاتیان و رێگریكردن لە زیاتر بڵاوبونەوەی ڤایرۆسی كۆرۆنا، مامۆستایانی ئایینی پێنجوێن بڕیاریاندا دەرگای مزگەوتەكان دابخەن.
وتیشی: داخستنی دەرگای مزگەوتەكان بە بڕیار و راوێژی هەریەك لە دكتۆر سەباح نەسرەدین بەڕێوەبەری گشتی تەندروستی سلێمانی و قائیمقامی پێنجوێن و ناوچەی یەكێتی زانایانی ئایینی و مامۆستایانی ئاینی بوەو داخستنەكەش بۆ ماوەی چەند رۆژێكە.
قائیمقامی پێنجوێن وتیشی: دەستخۆشی لە دانیشتوانی پێنجوێن دەكەین كە زۆر هاوكارمانن بۆ روبەڕوبونەوەی ڤایرۆسی كۆرۆنا بەشێوەیەك، پێش بڕیاری قەدەغەی هاتوچۆ قەرەباڵغی شوێنە گشتییەكانیان كەمكردبوەوە و هەندێك كاسبكاریش دوكانەكانیان داخست.
بەپێی نوێترین ئامار تا ئێستا ژمارەی توشبون بە ڤایرۆسی كۆرۆنا لە قەزای پێنجوێن 60 كەسی تێپەڕاندوە.