لیژنە هاوبەشەكانی قائیمقامییەتی سلێمانی ئاماری مانگانەی خۆی بۆ رای گشتی بڵاودەكاتەوە و بە پێی یاساو ریێنماییەكانیش هەر شویێنك پابەند نەبێت، رووبەرووی سزای ماددی و یاسایی دەكرێتەوە.


ئاوێنە، راگەیاندنی قایمقامیەتی سلێمانی: بەپێی ئاماری مانگانەی لیژنەهاوبەشەكانی قائیمقامییەتی سلێمانی لە بەرواری 1/3 تاوەكو 1/4/2019 لیژنەكان (3375) سەردانیان بۆ شوێنە گشتییەكان ئەنجام داوە، لە كۆی ئەو سەردانانەشیاندا، (319) سەرپێچیان تۆمار كردووە و بەهۆی پابەندنەبوون بە مەرج و رێنماییە تەندروستی و ڤیترنەرییەكانەوە (644) شوێن ئاگاداركراونەتەوە كە پابەندی مەرج و رێنماییەكان بن و بەهۆی سەرپێچیشەوە (21) شوێن داخراون. ئەمە لەكاتێكدایە لەمانگی شوباتی ئەمساڵدا (3633) سەردانیان كردبوو، (331) سەرێچیان تۆمار كردبوو، بەوهۆیەشەوە (60) حاڵەتی داخستنیان هەبووە.

لە ئامارەكەدا هاتووە، لەماوەی مانگی رابردوودا بڕی (48) تۆن و (785) كیلۆگرام مەوادو خۆراكی ماوەبەسەرچوو لە ناوبراون، كۆی گشتی پارەی غەرامەكراویش بریتییە لە (11) ملیۆن و (775) هەزار دینار و پێی  یاسا دەخرێتەوە سەر داهاتی گشتی.

بە پێی رێنماییەكانی لیژنە هاوبەشەكان هەرشویێنێك پابەند نەبێت، سەرەتا ئاگادار دەكرێتەوە، دواتر سزای ماددی دەدرێت، لە حاڵەتی دووبارەكردنەوەی سەرپێچیەكانیشدا رووبەرووی دادگا دەكرێنەوە.

لە ئێستادا لیژنە هاوبەشەكانی قائیمقامیەتی سلێمانی بریتین لە (33) لیژنە و بەردەوام و لەكاتی دەوام و كاتە پشووەكاندا سەردانی بازاڕ و شوێنە گشتییەكان و كۆگاكان و فرۆشیاران و پیشەوەران دەكەن بۆئەوەی رێگەنەدرێت خۆراك و موادی زیانبەخش و ماوەبەسەرچوو بە هاوڵاتیان بفرۆشن.