مەحمود محەمەد، وتەبێژی پارتی دیموكراتی كوردستان رایگەیاند، له‌گه‌ڵ یه‌كێتی نیشتمانی كوردستان بۆ به‌شداری پێكردنیان له‌كابینه‌ی نوێی حكومه‌تی هه‌رێمی كوردستان رێككه‌وتون و كێشه‌یان له‌سه‌ر پۆست نییه‌.

ئاوێنە: مەحمود محەمەد بە میدیاكانی حزبەكەی راگەیاندوە"ئەوەی لە ئێستادا گرنگە پێکەوە کارکردن و پێکەوەبونە."

سه‌باره‌ت به‌ به‌شداری پێكردنی لایه‌نه‌كانی دیكه‌ش له‌ كابینه‌ی نوێی حكومه‌تی هه‌رێمدا مه‌حمود محه‌مه‌د وتی"پێشتر بۆ ئه‌و مه‌به‌سته‌ سه‌ردانی زۆربه‌ی لایه‌نه‌كانمان كردوه‌و هه‌ندێكیان له‌گه‌ڵمان هاتونه‌ته‌ پێش و به‌شداری حكومه‌ت ده‌كه‌ن و هه‌ندێكیشیان ئۆپۆزسیۆنبونیان هه‌ڵبژاردوه‌و هه‌ندێكی دیكه‌شیان تا ئێستا وه‌ڵامێكی دیاریكراویان نییه."

ئەوەش لەكاتێكدایە كە رۆژی چوارشەممە یەكێتی و پارتی رایانگەیاند كە گەیشتونەتە رێككەوتن لەسەر پشكی یەكێتی لەحكومەتی داهاتوی هەرێمی كوردستانداو هەر ئەو رۆژەش بۆ یەكەمجار فراكسیۆنی یەكێتی بەشداری لەكۆبونەوەی پەرلەمانی كوردستاندا كرد.

نزیكەی شەش مانگ بەسەر هەڵبژاردنی پەرلەمانی كوردستاندا تێپەڕیوە بەڵام تاوەكو ئێستا حكومەتی نوێی هەرێمی كوردستان پێك نەهاتوە.