عەلی باپیر، ئەمیری كۆمەڵی ئیسلامی رایگەیاند، تا ئێستا نەیانوتوە بەشداری
لەحكومەتی نوێدا ناكەن بەڵام بەشداریكردنیان بەندە بە سێ شتەوە كە یەكیان ئەوەیە
تا چەند بەرنامەی حكومەتەكەیان تا چەند بەدڵ دەبێت. ئەو دەشڵێت"پارتی سەلامێکی
گەرممان لێ بکەن بەدڵنیاییەوە ئێمەش وەڵامێکی گەرم دەدەینەوە."
ئاوێنە: عەلی باپیر، ئەمیری کۆمەڵی ئیسلامی لەوتوێژێكدا لەگەڵ روداو سەبارەت
بە پێکهێنانی کابینەی نوێی حکومەتی هەرێمی کوردستان رایگەیاند"بەداخەوە ێکهێنانی
کابینەی نوێی حکومەتی هەرێمی کوردستان زۆر دواکەوت و نەدەبو ئەوەندەی پێبچێت، پارتی
و یەکێتی کە تاوەکو ئێستا ئەم وڵاتەیان بەڕێوەبردوە نیشانەی پرسیاریان دەکەوێتە سەرو
خەڵک ئەم دۆخەی پێناخۆشە."
سەبارەت بە ئەگەری بەشداریكردنی حزبەكەیان لە كابینەی نوێی حكومەت و
گفتوگۆكانیان لەگەڵ پارتی، عەلی باپیر وتی"برادەرانی پارتی چەندجارێک هاتنە لامان
بەڵام وەکو وەفدی سیاسی هاتن نەک وەفدی پێکهێنانی حکومەت، نەچوینە گفتوگۆ لەوبارەیەوە.
ئومێدمانوایە ئەوان سەلامێکی گەرم بکەن کە بەدڵنیاییەوە ئێمەش وەڵامێکی گەرم دەدەینەوە."
ئەوەشی خستەڕو"ئێمە تاوەکو ئێستا رامان نەگەیاندوە کە بەشداریی کابینەی
نوێ نابین بەڵام بەشداربونەکەمان دەگەڕێتەوە بۆ ئەوەی تاوەکو چ رادەیەک پارتی لێمان
دێتە پێش لە دو سێ روەوە. یەکەم: بەرنامەکەمان تا چ رادەیەک بەدڵە. دوەم: تا چ رادەیەک
بیروبۆچونەکانی ئێمە وەردەگیرێن و پێگەی خۆمان چۆن دەبینین لەو حکومەتەدا. سێیەم: خوڵککردنەکەی
پارتی کە ئەو خاوەنی پرسی پێکهێنانی کابینەکەیە چۆن دەبێت."
هەروەها وتیشی"لەگەڵ بەرپرسانی پارتیش ئەو قسەیەمان کردوە کە ئێمە بەشداربین
لە کابینەی نوێ یان بەشدار نەبین پێمان باشە باشترین حکومەت و پەرلەمانمان هەبێت."