لەژێر دروشمی "سیستەمێكی پەرلەمانی دروستو هەنگاونان بەرەو چاكسازیو سەروەری یاسا" سێیەمین كۆنگرەی پەرلەمانتارانی كوردستان دەستی بەكارەكانی كرد كە زیاتر لە 550 ئەندامی پەرلەمانی خولە جیاجیاكانی هەیە.
ئاوێنە: ئەمرۆ "شەممە" لەهۆڵی پێشەوای شاری هەولێر لەژێر دروشمی "سیستەمێكی پەرلەمانی دروستو هەنگاونان بەرەو چاكسازیو سەروەری یاسا" بە بەشداری زیاتر لە 300 ئەندامی پەرلەمانی خولی ئێستاو پێشو سێیەمین كۆنگرەی یەكێتی پەرلەمانتارانی كوردستان دەستیپێكرد، كە تێیدا پارتی دیموكراتی كوردستان پشكی سەرۆكی ئەو یەكێتییە بۆخۆی دەبات.
لەو كۆنگرەیەدا دەستەیەكی باڵا كە ئەندامەكانی لە 11 كەس پێك دێن هەڵدەبژێردرێن، چاوەروانیش دەكرێت سبەینێ "یەك شەممە" دەستە باڵا هەڵبژێردراوەكە لەیەكەم كۆبونەوەی خۆیاندا سەرۆكێك كە لەپشكی پارتی بێت هەڵبژێرن.