سەرلەبەیانی دوێنێ پێنجشەممە لە بەندیخانەی ئیلام-ی رۆژهەڵاتی كوردستان سزای سێدارەدانی سێ هاوڵاتی كورد، جێبەجێ كرا.

ئاوێنە: بەپێی بەیاننامەیەكی رێكخراوی مافی مرۆڤی هەنگاو، كە چاودێری مافەكانی مرۆڤ لە رۆژهەڵاتی كوردستان دەكات، دەسەڵاتدارانی كۆماری ئیسلامی ئێران سەرلەبەیانی دوێنی سزای لەسێدارەدانی سێ هاوڵاتی كوردیان لە بەندیخانەی ناوەندی ئیلام جێبەجێكردوە.

رێكخراوەكە ھێمای بۆ ئەوە كردوە كە سێ هاوڵاتییە كوردە بە تۆمەتی کوشتنی ئەنقەست دەستبەسەر كرابون و لەلایەن دەزگای دادوەری ئێرانەوە سزای لەسێدارەدانیان بەسەردا سەپێنرابو.
ئەوەشی خستۆتەڕو كە هێشتا ناسنامەی ئەو سێ هاوڵاتییەیان بۆ رون نەبۆتەوە بەڵام دەزانن كە كوردن.

بەپێی ئامارەكانی رێكخراوی مافی مرۆڤی هەنگاو، لەساڵی ٢٠١٨ دا لانیکەم ٧٠ هاوڵاتی کورد لە ئێران لەسێدارە دراون کە لە لەسەدا 26ی كۆی گشتی لەسێدارەدراون لە ئێران لەو ساڵەدا پێكدەهێنن.